Бурдж агъа чlалан lу мегlна ая, lудара дагь заманайин хаб аяттар э. Са бурдж пул гъуйуна, шейъ гъуйуна аркьаф э, сасра-тlутl суман алттвере нахшир э. lударинра ухшарвел э гебурин- алттадархьуб. Ге кардихъасра идефхьасе гебурин lударинра ттураниъ ухшарвел аяф.

Джан кея бурдж аттархьафе гlулин вахттуни. Уч кlалибарилди ухшар э хьес ягlа тlутlус, амма са чlукь хlа э. Гин дуламиш э хlа пай маларин иъ ухай, алчархьугуна инсандинфра уха. Ппара киве гебур гьава чlар алдава малдик, е алтухъ чlар алдава мукьарил.

Зас ппара алеркьвай агуфе гебур хlейванарил, дагибурил. Кlес акьуна кейхьугуна иъ агъдина авейи гебуриас.

Фидегьен рудж, кlил ттуттучира малди, алттушуна кекьуна учин кар аркьа бурджура. Агьал кегъархьай аме шиниккварис алтухъ агунара ахьасттава ге тlутlус ухшар иде нахшир, амма хабар давай инсандик кекьугуна кьацl икlа ги, вун фикир дакьуна учин кlилилди гъил верегъилди. Иттар ппара аркьа.

Гьал пасе хьин бурджунихъас, удигьай пуне бурджурахъас. Чвас фикир хьучин, бурдж агъа чlал сад ичира, амма гебурин ликlибан, пебан ахир гьерттин джуреф э. Бурджура   гlулин вахттуни ичин мушат аркьаф, бизар аркьаф, бурджуни, нагагь ге пул идехаб, кlилин lуьмурдиъ бизар акьасе, вун кедихьасттегьен, е вас хlуьлал акьасттегьен.

Хъара ая мишттин бурджра, вун герекди ая шейъ файшуна, са фулан вахттунилас гишттинф хаб рукьас аркьагъилди эесилди. Вун хал аркьай ая, хъаттархьуна ая ве гъвадил алархъа татттабур, гебур хъаяттис, агьалдин вахттунис лазимди адаваттис ушуна агъа гьудуркlа къайда тин пуна, дузди ге къайдайинттар хаб гъасе пуна фулан вахттунис. Гиштти аркьай аве фулан лазимди ая шейъ е масса ицlанф адавагуна, е lайи багьайи масса ицlанди ай, вафас уджузди гъас вей аягуна са вахттунилас.

Бурджуни йибаъ, ваалди хаб хlуьлкьумил дафайдина, гlезаб дайина гъарехаба савабин кар ая. Читинди аяттилди йиб садакьа э. Хъара пасе, нагагь бурджуни пул гъуйуна аяттивас пуна ая вахттуни кедихъас давей аяхаб, хlекьданди четинвел ай, васра алтухъ лазимвел адавай, вун атудегьен вахттуни садакьа аркьаяф хlисаб э.

Авалдин вахттари алтухъ пулара гlадавуйигуна гъиларигl, бурджара алтухъ аркьайдавуйи, ппара уйиф барамбарди гъуланди, масса ицlанди шейэр. Бурджуни гъуланди дахьуна даверегуна, хьудегьен вахттуниъ ай алучlайра и бурдж кедихьас. Вахттуниъ ай дайина ая бурж гардандиъ ая къан хlисаб э. Ягlайин ягъас бурдж кидаваф, е бурджуни пул дайина аяф  сад-lуд дала ахьасттава. Лазимвелра ая ге кардин, инсандин lассевелра хьуна ая.

Келхъенттар ппара ая пул гъуланди хуппай йиркlураъ чире хиялар архьай. lуьрус мисала аяф э, мегlна: «Гъуланде сасрайинф са вахттунисттегьен, ицlанде веттар кьацlраминдай». Вун пул гъулангун бурджуни са вахттунилди э агъа гъуланф, хаб йис lегвалди, веттар суман кьацlраминдавай ицlанде агъа. Гиштти хьасра э.

Шейъэр масса ицlан нае дуькандиъ кканчира ачушучин, вас гебури аттивасе бурджар кеяттарин ттурар ликlина хlа китаб, дайиттара аве исарилди, хум весегьан, е джуре кар хьуна гlачавесегьан пуна. Са пай инсанарин ая, хlуькуматин кардин, е сае кардин пулун кьимат гъуянасттегьен дуьканарин шейэр гъуланди бурджар аркьаттар, чиппин гъилиъ пул хьугуна кедихьаттар.

Инсанди сад сайик келхъенас, lемалар акьас чlевен аркьайдава. Ахирахъдира пас кканде, бурджуни пул, шейъ гъуланттари вахттуниъ ай кедихьагъилди, бурджуни пул ицlанттарис сабур аркьагъилди, акьуна ая иджвел гlачадаверегъилди. Бурджар, аркьай кедихьаттар хьурай!