Iабалан кьадри мус хьучира аяфе хье джалла миллатарис, амма гьерттин гIедатар гьергъилди э. Агьалра аме шиниккв хуная хулади Iаб гъаре гIедат. Гъарефе Iаб садпе шиниккв хугуна, шиникквдин бабан багун-кIилинттари.

Файдиная Iаб амилгванде хабди ху шиниккварисра. Iаб гъарегуна гихъай гъарефе хъара шиникквдис лазим вере шейъэр: икIаттар, гIикIаттар, алчархъаттар. ИкIас аркьафе Iу джурайин баджгIанар. ГIулин баджгIаниъ икIа хъачар, Iурдинттиъ — хьеяр. Хъачар архъафе бицIитис эмкI дичирай пуна, хьеяр икIаф Iурдана мекI дахьурай пуна.

Рушан алчархъаттар верефе Iекве кьумашинттар, кIиркIанттар — бицIи мучIе рангунинттар, аккихьа памазин кьумашин чаппар. Хуна са хIефттайилас икIа шиниккв Iабаъ. Нагагь бицIиф дахи хунаяхаб хъара иттарверехаб арта са хьибу ваз хьасттегьен. Гилас кьанайи икIафттава, кьана хьехаб четин верефе бицIиф вардиш акьас Iабахъди.

Iаре Iаб даркьанфттава агъай аве, бицIиттин фун иттардахьас. БицIиф икIастти Iабаъ, кейхьа дуьгIе кея кIедж, кIиликк кичикIафе гунин кьурц батIарди гъархьас. Хъара рушан кIиликк кичикIа хIуьттез, батIар кучарар алеф хьас. КIиркIан кIиликк ккичикIа леIен, йиркIуран цIупеф хьас, зурба хьас.

Iаб дадуьхьуьна бицIиф гъадархьа вахттар аве, гиштти хьугуна духIуба акьуна кканве Iаб багунттарихъай. ИкIафе Iабаъ бициф гьертти гьергъилди ис, исна сур хьасттегьен.

Наибет Гасукаева