Малагусейнов Гусейни Кубутаевич хуф э 1953 иса Типпигъарин хIуриъ Агуларин райондиъ са гIеджиз хизаниригI. Гин дадасна бабас агъафе Кьубутайна Цеваз. Мебурихъ хъайуйи ери шиниккв, ке хIаф и Гусейни.
Гусейнин бицIи вахттар алттушуная рехIетти, самуз кегъархьухаб мис хьуная ппара загьматар. Iайи загьматар гис хуне учин дад кIехаб. Илгуне мебур бабахъай ери шиниккв, гIуьфу кIиркIна Iу руш.
Гусейникес садпуна хьуне хулан хIаф. УхIуна, хIа акьуна, сакин акьас алчархьуне мил джалла чуппара чияр.
1971 иса, Типпигъарин махьтаб ккиркIухаб, ушуне ме хурас Махачкалайиди ДГУйин исторический факультетиди. Гисади Гусейни ушунаф бабан гудж хьуна э. Фидегьен учис читинвел, загьмат хьучира, хуруна кканхьуне бабас учин кIиркIа.
Хуруна ккиркIухаб, адине ме хIуриди. Мидас гьикуне ме ФитIарин махьтабиди мегIелимвелди историн дарсарин. Са Iу исари кар акуна те махьтабиъ, хаб адине ме учин хIуриди. Мисаъ Гусейни Кубутаевич гIаттивуне Iудпе секретарьвелди комитет комсомолайин Агъуларин райондин. Хабди гикес хьуне завотделом культурайин райисполкомдин.
Гусейни Кубутаевич хьефе кар аркьай корреспондентвелди газитин «Сельская новьдин».
МайцIурпе исари Гусейни Кубутаевич адине учин махьтабиди кар акьас мегIелимвелди, историн дарсар ес. Ги хъара кар аркьай хьуне хIавелди махьтабин интернатин.
ЙицIу исалас вартт хьуне кар аркьай директорвелди Типпигъарин махьтабин.
Гусейни Кубутаевич ппара идже мегIелимра, воспитательра и. Шиниккварис ппара кканверефи ге. Iайи гучIафра и гигьас, ппара хIуьлматра аркьафи гис. Ппара дусттара хъафи Кубутаевичахъ. ЙиркIвуран ппара идже дуздин инсан и ге.
ХIуькуматин курар аркьаф кидай, Гусейни Кубутаевича хъара ликIенди шаирара. ЛикIенас ге хъучучIуф хIа яшар хьугуна э. Ппара гин шаирар э рубаибур. Кубутаевича лиркIенди Iуьрус чIалалдира, агъул чIалалдира.
Кубутаевичан шаирар э хIа гафараринттар Агъуларин райондихъас, дагьарарихъас, чуларихъас, канвеларихъас. Кубутаевичан идже китаб айя шаирарин «Без узды» агъаф. Гусейни Кубутаевичахъас ппара чIалар пас хьасе, амма фидегьен пучира, хъара гебур чIукь хьасе.
Гусейни Кубутаевичан хьирас агъафе Ибичаева Барият Гададовна.
Гусейни Кубутаевичахъна Барият Гададовнайихъ хъайя са кIиркIна хьибу руш. Гебур джаллабур хIа акьуна, дуьхьуьна арайил акьуне гебури.
Гусейни Кубутаевич дахи, джигьилди ами кIине. Гунагьарин гIеф акьурай учин.
«Ппара идже инсан и Гусейни Кубутаевич. Гихъай фиттихъас кканчира гъургъас вейи. Фиттин кканчира гъавурди айя инсан и ге. Ппара йиркIуран мерттеф и. Фера Iайвелар акьас фикирдиъ авейдавуйи гин учис Iайвел акьуттарис. Гишттин инсанар авейдава сасаддала дуньяйиъ. ХIейифе гишттин инсан дахи кIес», — агъа Кубутаевичахъас гин цIуппе дусттура, член Союза Журналистов Российин, Абдурахман Манафова.
Нафият Шамсудинова
