Бедухъарин хIур ппара гьавайил алеф э. Дуламиш хьас ме ус ппара читин мукь э. Зун чвас ахъакьасе са гIеджиз Бедухъарин хизанарихъас — Сафаралиев Манафахъасна Сафаралиева Бажиханумахъас. Iудара мебур хунаф четинра гашин вахттари э, Сафарали 1942-пе иса февральдин вазала, Бажиханум 1939-пе иса майдин вазала.
Гебур Iудара са гIеджиз хизанарин шиникквар э. Гебурин дадар бабарихъ хъахьуная ерид-муйяд шиникквар. Курар-лихунар Бедухъарин хIуриъ гебурис ахьуна адава. ДехIела бицIи ами шиникквар хъучикай хьуне лиханас колхоздиъ. Маларихъ, хIуппарихъ вес, хуппурар, гIарар уцас, язанар акьас, джархан, суьлен кIетIар завал акьас, хъара гьер джурейин курар акьас. Чаб хугунанхаб мич гебурис кIвалди амеф э, чиппи колхоздин леджбервел аркьай.
Са хубджи кегъархьухаб, еридпе классариди агъархьугуна, Манафакес хьуне хIуьппехъен. Гегуна бицIи-бицIи хьуне мис таджрибра. ЯгIархьуне мис узас хIуппар, хIуппар архIас, батIарсуман хIуппарин тум ппара акьас. Тегуна ппара гъил гьучихьуне ми учин дадар бабарис шиникквар ухIас.
Муядпе класс Бедухъарин махьтабиъ ккиркIухаб, ккейчIуна махьтабиккесра, ушуне ме маларихъ, хIуппарихъ. Хабди хьуне микес хIуппарин бригадир. 22 ис хьухаб акьуне ми учис хизанра, гьеге уч суман са зурба колхоздин леджбер Бажиханум агъаф. Ме хьуне колхоздин маларин доярка.
Бажиханум лап бицIи ами гъай хьуне учин бабана хIа ччиччи чиппихъай колхоздин кардил. Ми аркьай хьуне урчарин къаравулвел, бабана ччиччи маларис ккехъасттегьен, салар мертт акьасттегьен. Хъара ме вей хьуне гебурихъай колхоздин хуппуриди. ХIаттари уцуная мукьариас, гисаъ хъусуна аме кIетIарна сумар завал аркьай хьуне ми. Гьегиштти бицIигунанхаб кар аркьай вардиш акьуне Бажиханум.
Муядпе класс ккиркIухаб сара ушуна адава ме махьтабиди. Аркьай дояркавелра экьуне кумак аркьай учин бабар дадарис Бедухъарин хIуриъ. Хабди ушуне шувас Манафас.
Iудара, сад сайив фитIу вецар суман, лиханди хьуне мебури чиппин дуламиш акьас.
Хьуне мебурис ерхьид шиникквара, гIуьфу рушна са кIиркI. Ппара четинди дуламиш вей хьуне мебурин Бедухъарин хIуриъ.
1990-пе иса гIулана айчIуна Бедухъарин хIуриас ушуне мебур джала хизанар хъай Авадан хIуриди Докузпаринский райондин. Гисаъра мебури Iудари кар аркьай хьуне совхоздиъ. Манафа кар аркьай хьуне фермайин къаравулвелди совхоздин маларин. Бажиханума акьуне кар дояркавелди гьеге фермайиъ. Хал-хизандалди хъай экьуна ахьуне мебур гьеге фермайил, са чарайин джигагьариъ.
Ппара гIезабара, читтинвелара агуне мебурис гисаъра. Хъай ерхьид шиникквара, гьуркIа Iеле гунира, аликIа канра адавай ахьуне мебур гисаъ са Iу исари. Хабди, шиникквар кегъархьухаб, идже хьуне мебурин дуламиш. Джалайи акьуне чиппифас агърукьа курар-лихунар фермайиъ, сур ушуне Дербендин базариди ариш-вариш акьас.
Гъушуне мебури чиппис Авадандиъ джилра, хал акьас. Акьуна гисаъ Iу мартабайин хулара. Джала шибера йине шуварис. Акьуне кIиркIас сусра. Джала ппара иджи дуламиштти ая.
Уч Манаф кIине 2008-пе иса, Бажиханум кIине 2018-пе иса.
Нафият Шамсудинова
