Дуньяйиъ ая четинвеларихъ къуттурфуна инсанарис ачухъвелар, мункинвелар алтухъ вея ягъалас ягъа. Хубджи вахтт алттушуная Дагъусттандин шагьурариъна хIа районариъ ачмиш акьуна Сбербанк идарайин банкоматарна терминалар. Удигьай сагелай мишттин банкоматар ишламиш акьас мункинвел хьуне шагьурариъ ая инсанарис, хабди гебур гурзар акьуне хIа районариъ. 2018-пе исалас Сбербанкдин идарайи башламиш акьуне Дагъусттандиъ банкоматарна терминалар иянас адава мукьариъ. Фас пучин, сбербанкдин карта ишламиш аркьа инсанар хье вилаятиъ ппара хьуне. Сифтта бицIи районариъ, варха хIурариъ ая инсанарис пул лазим хьу вахттуни алчархьайи багулив фая хIа районариди вес банкоматихъди ера РСХБйин банкоматиас аттивас, процентара кетIуна. Пул аттивайчира, сайиштти лазим мукьуйиди гьикайчира Сбербанкунин картабур фаттарис четин вейи.

Гьемишттин четинвелар алчархьайи Агъул райондин халкьарисра. Са Iу исар милас удигьай Агъул райондин МФЦйин идара ачмиш акьухаб 2016-пе иса, са вахттра алттдушуна Сбербанкунин банкомат алийине гисаъ. Ппара курарис ачухъвел, мункинвел хьуне инсанарис ме банкомат хьухаб.

Амма ахиран вахттари банкомати иджи кар аркьай андавуйи, фас пучин, ерсе хьуна хъукъайи ге. КьацIра миндавай ге чIир верегунас Сбербанкуни файдине цIае джурейин банкомат. Ме банкоматиъ ая ппара гьер джурейин функцибур.

ЦIае банкоматиъ мункинвел ая QR коддихъай кар акьас, пул аттивас суман, вея ачикасра, кея налогарин, Iекварин пулар, улакьин налогар, штрафар гьикасра ве, хъара ацIуна сасра мункинвелара.

Сбербанкунин банкомат суман, ме идарайиъ ая Россельхоздин банкоматра. Миштти идегуна, Агъул райондин варха хIурариъ ая инсанарисра ппара ачухъвелар хьуне ме цIае джурейин банкомат арайил хьубалди. Хъара рехIет хьаси мишттин банкоматар гьер са хIуриъ акьухаб.

Наибет Гасукаева