Джаннат бабан лекун кIенакк ккея. Зун бицIигуна гьемишан фикир аркьафи фидегьен четин пеша э бабанф, хIапай ппара шиникквар хъая бабанф. Шиникквар сад-Iуд хъайчинра ппара хъайчинра, бабан загьматин ккидиркIва кьимат ая. Сасра инсанди акьу иджвел, ахъаджихIуб хъучархьасттава бабанттихъ.
Фас пучина бабан ахъаджихIуб шиникквдис вереф хугунахъасхаб дава, хастти бабан гIанаъ ами. Шиниккв гъургъас хъучучIагунара ке удигай агъа чIал э «баб», пуна ккиркIвасттава бабахъас агъадегьен батIар чIалар. Авала ппара шиникквар хъая бабар хIурариъ суман шагьурариъра уйи. Хабди хьуне вахттар шагьурариъ гьер хизандиъ сад, Iуд аяттар. Амма хIурариъ агьалра кей ая ппара шиникквар ая хизанар.
Арсугъарин хIуриъ мусс хьучинра ттур аяфи ппара шиникквар хъая хизанарин, фас пучина хулан баракат э гебур. Абдуллаева Харижай Ахмедовна э ппара шиникквар хъая баб. Ме уч хуфе Буршагъаъ 27 сентябрьдиъ 1950 иса. Шувас ушуне Арсугъди Абдуллаев Курбан агъа идемис. Мебурихъ хъуйи цIеIуд шиникквар. ЯгIайин ягъас мебур ая ерчIуд: ерид шибер, Iуд кIиркIар.
Харижай учи кар акъуфе хьибцIурна Iу истти мактабиъ техничкавелди, хабди кар акьуне колхозариъ дояркавел аркьай, шуй, Абдуллаев Курбан, ушуфе хIуппарихъ чиппин дуламишар акьас. Фидегьен четинвелар, дардар, гъамар алайшучинра, маслихIетилди, сад сайис кумак аркьай ухIуна арайил акьуне мебури чиппин шиникквар.
ЯгIайис мебурихъ хъая къана хьибу хуттул хъара сад правнук. Хье дуьяйил алди аядегьен инсанарин дин-гIедатар гьерттин гьергъилди э, амма гьер диндиъ агъа дадас-бабас хIуьлмат акьуб — ке ппара кьимат ая кар э.
Сагелай са инсанди хабар гъушуная хье пайгъамбардифас (с.гI.в.с.), зе багухъас ке ппара хIуьлмат гьанас зун акьуна канеф? Ги пуная «ве бабас». Хуппай хаб адине ме хабар гъушанас, гьегиштти ерхьигелай адиная ме инсан пайгъамбардилди (с.гI.в.с.). Ерхьигелай пуная мисс «бабас», еридпегелай пуная ми «ве дадас». Хъара хье шариIэти агъа: «Джаннат бабан лекун кIенакк ккея».
Наибет Гасукаева
