Баб садпе чIал э шиникквди агъаф, ке итте гафра ге э. Ме дуьйил хьес ке багьа инсанарикес э баб. Бабан ширин джил, кканхьунар, дарман кея гъилар, итте ямагар, нур ицIан сурат кьацIра хум весттава бабар ккане валадарис. Шиникквди хулаъди ачадигуна, ке удигьай хабар гъуршанде баб нахьи пуна. Баб э учин шиниккварис джуревел даркьай садтти фацуна иджвелра Iайвелра ягIар аркьаф. Бабан загьмат ппара э. ЕрчIу вазди баба аккизийина загьматра кей учин йиркIуракк ухIа хасмиде валад. Хухабра хьимудна сад гIезабин ягъар-Iуьшар алаве касиб бабарилас шиниккв кегъархьасттегьен, джуре курарин загьматар кедавай. Баб диндиъра ппара хIа дараджайиъ фацуна ая. Бабарин лекарин кIенакк джаннат ккея, хьибугелай баб, хуппай дад, дадар-бабарис вас фидегьен гиран хьучира уф пуна эл агъмихьа пуна Iекьулар ирцIанде хьес Исламди.
Фидегьен загьмат дивучира бабахъас, шиникквдивас гин загьматин кьимат йис хьасттава. Вахттар вея, хье бабар Iусе вея, цIе хизанар хьуна джигьил бабара ве. Са паярин бабар дуьйил андава, гебурин мурад э са улдехIера йирхIас бабас. УхI бабар, гебурис гиран маркьа.
Са мисала аяфе. Шиникквдис кканхьуная учин бабан загьматин кьимат кедихьас. Ге кардис ягъцIур истти хъахъуна баб аруцай ахьуная валад. Ге вахт ккеттушухаб, адина са гIелим инсандивас хабар гъушуна ая ми, кеттархьунев пуна учикес бабан загьматин кьимат. Яшара хьуная Iекьул кея гIелимди пуная ме валадис: «Вун бицIигуна Iешай ве баб гъайши са Iуьшан загьматин кьиматракехIей йиндава, мидегьен гагьди баб гIунил алгъикIуна аруцай».
Хье хIуькуматиъ ноябрь вазалан ахиран вахадну ягъ акьуная бабан Ягъ э пуна, бабарис ме ягъадехIера яб ирцIангъилди. Садпегелай ме ягъ акьас алучIуна уйи 1915 иса, акьуне 1 декабрьдиъ, ама илгундава. Хабди, 1998 иса Российин Президенти акьуне указ ме ягъ аркьагъилди, бабан лазимвел агвар акьас гьер инсандин Iуьмурдиъ.
СССРдиъ уйи гьер наградабур бабарис. «Материнство» агъа медаль ирцIанди хумбарис гIуьфу-ерхьи шиниккв хуна хIа акьуттарис. «Материнская слава» агъа орден ирцIанди хумбарис ерийилас ерчIу шиникквдилди хуна хIа акьуттарис. «Мать-героиня» ирцIанди йицIуйилас вартт шиникквар хуна хIа акьуттарис.
Мишттин тамашин шейэр ая хумбарихъас. Кеппара шиникквар хуна дишагьлихъ хъай уйи 69 валад.
