Вун хулади адегуна,

Хал арцlай ве, зе баб,

Ахттилат акьугуна,

Йиркlв арцlай ве, зе баб.

Бабан джафа ппара э,

Бабан загьмат зейда э.

Йиркlурас ккане инсан,

Час вун ппара багьа э.

Ппара тамашин зад э дунья. ТIабиIети дуньяйил яратмиш акьуная агъзур джурейин джан але Iеламатар.

Джакьвар, нахширар, хIейванар, гьелбетта инсанара. Фикир акьучин, баб э кIилди дуньяйин кlил. Джала джан аледегьен задарис баб хIа савкьат э.

Баб пугуна, гьер са инсандис ме чIалун мегIна хъара лап гьава э. Гьемиштти идехIела э бабан загьматис фикирна калима алтухъ идеф.

Кlилди хIа курарихъ, хIа иджвеларихъ, зурба инсанарихъ бабан гъил гьучихьубна кумак хъаве. Мишттин гьер са вакъиайихъ учин хIаягъра хъаве.

Хье бабарихъра хъая чиппин хIаягъ.

ГIедат идегъилди ме хIаягъ къаршиламиш аркьай ве ноябрьдин вазалан ахиран хIефттайин элхIед ягъа. Баджат аве ме ягъа дуньяйин са мурттра кехIей, ме хIаягъ даркьа ус.

Мебур пучира, хье хIуькуматиъ ме хIаягъ бадил хьуф кьанди э. Арайил акьуф ме ягъ хье Российин садпе президент Б. Н. Ельцинан указилди са агъзурна ерчIу вершна ерчIцIурна муядпе исан хьибцIурпе январьдихъас мич.

Бабан ягъ — ме хьес кIилдибурис ке герек иде ягъарикес сад э. Бабан ягъ пугуна, хье Ислам диндиъ кIилди ягъар бабарин ягъар э. Фас пучин, еригелай баб пухаб, сагелай э дад агъаф.

Хъара агъа, бабан лекун кIенакк э валадарис джаннат аяф.

Гьелбетта, ме агъа чIал дава баб ухI, дад фадихь пуна. ХIуьлмат шиникквари дадасра, бабасра акьуна кканде.

Амма, ичира баб адавахаб, шиникквар, удигь кIил акьуна бицIиттар, ппара гIеджиз ве дад адавагуна далара. Ме кардихъас э агъай вереф, дад кIина шиниккв сагелай етум э, баб кIиф еригелай пуна.

Фидегьен хьин гьер са ягъ бабан ягъ э пучира, шиникквар чаб хIа хьуна, чиппин хизандин, хулан, кардин эессибур хьухаб гьер ягъа давай, вазала, е дахьучин иса са ягъа дехIера бабна дад даргваттар аве.

Фидегьен четин ичира, исан кIилил вере са хIаягъан ягъа дехIера адина аларуцуна, йиркIв гъушуна кканде валадари мебурин.

Ме ягъа кIилди махьтабариъ, садикариъ аркьай аве бабарис табрик акьубан мегIракабур. Мишттин мегIракабурил бицIиттари ахъаркьа шаирар, аркьа мегIнибур, лехъунар. Са чIалалди, ацIуна шадвелар аркьа бабар бадалди.

Бабара ппара бахилди аве чиппин валадарин гьунарарил.

Фас пучин, зе фикирдилди, валадар хьухаб бабар яшамиш вереф гьегебур бадалди э. Ме кардин шигьидар э ягlайин ягъас бабарихъас аядегьен мисалабур. Гьер са бабас, уч дуньяйил амедегьен гагьди, учин шиникквдин са ис ичира, верш ис хьучира, гебур бицlиттар суман ве. Гебурихъ ахъихьуна аве, гуни lуьтlунчин, гаш ккейчин, гlезаб кейчин ягlар аркьай.

Нагагь са бицlиди иттар хьучин, е йиркlв сакин давай, е lуьшан ахун адавай, мертти аваран хьуна ахъихьа валадихъ.

Ме кар кlвалас гьадатуна, багагь хье вазифара э бабахъна дадахъ ахъаджихlуб.

Хlа инсанар хlурарин, хуларин баракатар э. Мебури ирцlан ягlарвелдихъна lекьулдихъ хъучархьа зад са фера адава. Дехlела мебури ирцlан lекьулра кьабул акьуна кканде, аркьа ахттилатарис фикира йина кканде, мебурин гьер са иде — даваттин къайгъура акьуна кканде.

Хьин мусра кlвалас гьатуна ккандава хье бабарин загьматин джафа, ахъаджихlуб.

Ягlай кканде хьес, фидегьен иджвелар хьин акьучира, бабари хьин бадалди атlу са lуьшан ахунра кехlей хьефас хъатlас хьасттава.

Джандин сагъвелна йиркIуран рехIетвел кам дахьурай джалла дадар-бабарин!

 

Салихат Малагусейнова