Дуньяйин варттал джан але задар ппара ая. Мебурихъ хъуттурфугуна, хьес аргва тIабиIетихъ фишттин зурба кьуват хъайчин. Гьаме кIилди джан але задарикес ке тамашинф инсан э. Тамашинф мин ягIа айчин багагь адава Iуьмур э.
Сайисра ягIай авейдава учихъ фи Iуьмур хъайчин, хьиму ис, хьиму ягъ, хьиму дакьикьа хъамичин. ДехIела э хIа инсанари агъай вереф, инсан дегьен зурба задра адава, уч дегьен гIеджиз задра адава пуна. Е дахьучин хъара агъафе мебури инсан эл ихьу кIечI хIисаб э, нае дакьикьайи кканчира чурхъуна эл аттушуб мункин кар э пуна.
Амма инсанарихъ хъуттурфучин, мебурин йиркIураъ кIиб кьацIра аяф суман аргвайдава. Дагибур дегьен лирханди, дива загьмат. Завал аркьа девлетар, алиланде хIа дараматар, гIархъайна укъай ачирхIа сури сурин хатирариъра. Хуппай са ягъа хабарсузди кьацIра дуньяйил дахьуфсуман кIина ве.
Иттархьучира Iайвелихъди э пуна фикира кехIей вейдава. ДжикIенас алучIа учис чарабур. Гьалдин вахттари батIар хуру, ягIа духттурар айчин, авалдин вегIдабури мишттинттар адавуйи. Халкьдин джерехIери джиркIенди авейи йирхIунарис мелхIемар, итталарис дарманар. Дарманара ис исалас алтухъ вей уйи. Гьал духттурарин дарманарихъ ппара хъучавейчира, ишламиш аркьай аме авалдин гIедатинттара. Мебур э итта мукь тIишиб, рубар ачирхlуб, хъара иттал алгъазийи усариас иъ адатуб.
Ме иъ адатубас агъа хиджама.
Хиджама ке удигьай ягIархьуне Iерабарин инсанарис. Садпе хиджама акьуне пуна агвар акьуная авалдин китабариъ, са агъзурна гIуьфу вершна гIуьфцIурпе иса хье эра хьастти. ЯгIа миштти сагъ акьубан джуре ишламиш аркьаф Iари Машрикьдиъ дава, кIилди Европайиъ э. Ме терапия гьучихьа Магърибдин хIа пай духттурханабурира. Хиджама акьас ве лап ттур ая, ппара машгьур иде, хIа пулар хъая инсанара. Миштти идегуна, хьефас пас хьасттава ме чара адавай пул хъадаттарин чара э пуна.
Мин иджвелихъасна Iайвелихъас ягIайин ягъасра кехIей хIуьджатар аме. Итта усаъ гьеркIв але хIуьтте, бицIи кантI суман зад ирхIуна алиланде банкабур. Ме банкабуриди агъадива чIире, тIакьван иъ. Мишттин иъ фатугуна, инсандин джан азад ве агъа чIирхIе шлакариккес, иъ цIае ве.
Иъ цIае акьуб уч ява-яваштти вере кар э. Хиджамайи кумак аркьа ме кардик тегIди кихьас. ЧIире иъин са пай адатухаб, цIае иъ дахи алтухъ ве. Хабди хронический итталарин ишарабура яваш ве.
Хиджамайин кумак ппара э. Мебур кIилди хIисаб дивуна арайил хьасттава.
Кумак ве ме забун хьас, воспаленибур, раджарин итталар дахьас, холестерин ахтт акьас, иммуниттет гъадивас, йиркIуран, табарин итталарис, Гъиларин, лекарин, гIунарин, дамарарин Iуьрар алартас, давленибур аяттарис, хъара ацIуна сасра итталарисра.
Иъин табар агьартIас алучIугуна хъурхут хьу нервабури ке удигьай хабар ирцIанде яIар-дарун маскъус. Ме маскъу хIеракат акьуна ацIас алучIа Iархьу табар цIае иъилди. Хабди гьава давление алархьа, сахардин кьадар дуз ве, атеросклеротический бляшкабур, тромбабур, жирар гуланде, иммунитет гъайша, джалла Iуьрар яваш ве. Са чIалалди, иъ дихье хьуна дахи кар аркьа. Клеткабуриъ кислород ппара хьуна, кIилди герек адава
Джалла дарманарихъ суман, хиджамайихъра Iайвелин багвра хъаве. Хиджамайикес хатIа хьуб мункин э, тромбабур ппара аяттарис, кьанди ОРЗ-йин, гриппин раджар алайшуттарис.
Хиджамайин иджвелихъас ппара гъургъас хъучучIуне инсанар са къа исан удигьай. Фас пучин, мегуна э ме хаб инсанари зайдайи ишламиш акьас хъучучIуф.
Амма хиджама аркьагуна мугъатвелра фадихьуна ккандава. Гьер са инсандихъ хъай кканде учинттар иде кIилдин банкабур. Сасрайинттар ишламиш акьучин, хIа мункинвел ая, кея итталарин варттал джуреттар алгъазиянасе пуна.
Духттурарира насихIет ирцIанде, ишламиш акье хиджама, амма эхIттият фадимихьа пуна.
Салихат Малагусейнова
