МегIелимдин пеша мус хьичира ттур ая, хIуьлматлу, хъара загьматин кар э. Мишттин кардис ппара сабур хъай кканде, фас пучин, хьес джалабурис ягIа махьтабиъ ппара джурейин хасиятин, тIул-тIабиIетин шиникквар ая. МегIелмдис ккидиркIва кьимат э учин акьу кардин загьинлувел, таджрибвел атас хьухаб мактабиъ кегъархьа шиниккварис. Хье Агъул райондин бицIи хIурарин махьтабариъ ая мегIелимар, йиркIураасти чиппин кар акьуттар.
Мегелай зун ликIенасе Арсугъарин хIурин махьтабиъ ацIун исари кар акьу мегIелимдихъас, Алаудинов Гасан Исаевичахъас.
Гасан Исаевич хуфе Агъул райондин Арсугъарин хIуриъ 1935-пе иса. Дадар-бабар мин дахи кIеттаре, хъая са чи училас хIаф, гера дахи кIине дегIвин вахттари. УхIуне Гасан Исаевич учин адада Рамазан агъатти. Са вахт ккеттушухаб адад файшуне армиди, дегIви хьас Iу исан удигьай. Армиди ушуф, тидас гьикуне ме дегIвиди. Мисаъ ппара гагь хьуне мин госпитальди ай, фас пучин, багулив мина чурхъуна мин лек кеттархьуне. 1946-пе иса адине мин адад дегIвиас. Ададан хизанаригI хIа хьуне ме, ушуне махьтабиди якьудпе класс ккиркIвасттегьен. Хабди ушуне Курагъарин махьтабиди. Махьтаб кIиркIухаб, 1954- пе иса учIуне хурас Дербентин педучилищейиъ бицIи шиниккварин мегIелимвелди. Дербентиъ хурай ами, 1958-пе иса ме ушуне кар акьас Гъудагъарин хIурин махьтабиди. Хурубар ккиркIухаб, ме ушуне кар акьас чиппин хIурин махьтабин мегIелимвелди. Гьеме иса Гасан Исаевича акьуне учис хизанра. Хизанди ми акьуне Фатимат, Арсугъарин хIурин Курбан агъаттин руш. Хизандин бина ккийигъилди, хъучучIуне ме учис хулар-мукьар арайил акьас. Хулар ми учи учис акьуне Iэрабайилди гъай гъванар. Фатимата кар аркьай хьуне чиппин хIурин колхоздиъ. Хабди, 1961-пе иса Гасан Исаевич хаб учIуне математический факультетиъ заочно хурас Дагестанский Педагогический Институтиъ им Г.Цадасы Махачкала шагьурдиъ. 1965-пе иса ме гьикуне Iемухъарин хIурин махьтабиди математика гъаре мегIелимвелди, учин хизанарахъай. Ме вахттунис мебурихъ хъуйи бицIи валадара. Iу истти кар акьухаб, 1967-пе иса, хурая мукьра ккиркIухаб, ме хаб гьикуне чиппин хIурин махьтабин директорвелди кар акьас.1979-пе исалас 1983-пе исалди рукьуна Гасан Исаевича кар акьуне Курагъарин хIурин махьтабиъ. 1986-пе иса адине ме чиппин хIурин махьтабиъ кар акьас математика гъаре мегIелимвелди.Те вахтари Гасан Исаевич хьуне хьуриъ садпе мегIелим математикайин хурубар кеф. ЯгъцIур истти кар акьуне ги махьтабиъ.
Шиникквар Гасан Исаевичахъна Фатиматахъ кIилди хьуне йицIуд- якьу рушна ерхьи кIиркI. 1984-пе иса Фатиматас йине джавиз-«Мать-героиня» агъа ттур.
Шиниккварикес хьибу кIиркIа гъушуне математикайин мегIелимвелдин гIилмибур. Шибери хуруне педучилище. ЯгIайин ягъас са кIиркIа, Алаудинов Рамазан Гасановича, кар аркьая Арсугъарин махьтабин математикайин мегIелимвелди. 2021-пе иса ме хьуне директор МКОУ «Арсугская СОШ».
Наибет Гасукаева
