Агъул райондиъ гьер хIуриъ ая мазгитар. Са-са хIуриъ ая мазгитар э минарет алдаваттар. Лап авала мазгитар аркьай хьуная минарет алдай. Гиштти акьуная мазгитар хIисаб аркьайи исар ппара хьунаттар.

Агъул райондиъра ая хIурар минарет але мазгитар аяттара. ЧIаарин, Гехъуьнарин, Типигъарин, Арсугъарин, хъара аяфе агъа Курагъарин хIуриъ. ЧIаарин, Арсугъарин мазгитарин гIанар хIисаб аркьа сасуманттар. Вартталас агугуна Арсугъарин мазгит ппара хIаф дава.

Уч мазгит акьуная хье гъвандикес, кейцIвай цIаку багвара сасуман шергве цал хьас. Кьибла багулихъ хъая цал акьуная гъван адихьай накьиш алеф. Ме цалиъ ая са гъвандик ликIиная мазгит акьу вахтт — 1284 ис. ХIурин хIа инсанарира агъай хьуная 16 асирдиъ акьуф э пуна.

Ме мазгитан варттал алихьуная батIар гирген минарет. Агъзурна ерчIу вершна майцIурпе иса къадпе асирдиъ Советский хIуькуматин вахттари диндихъ хъудугъа инсанари акьуная мазгитакес клуб. Хуппай са вахтт хьеф микес акьуне Iэмбар.

Ге вахттари диндиъ ая инсанар вей хьуная хIурин вартти кIилиъ ая бицIи мазгитаъди. Мазгитан имам те вахттари хьуная Шейх Сефер-ХIаджи Арсугъаринф. Ме имам и диндис ппара цIуппе гIилми гIан ацIу инсан, Тарикьатский шейх. Мин дарсар гъушу муьридара зурба ягIарвел хъаттар хьуне. ХIурин джемеIетин арайиъ мис ппара хIуьлмат уйи.

Гихъди вейхьуная хье райондиъ ая гьер хIурариас муьридар. Са вахтт хьегуна кафирари ме кулак э пуна адикуне. Iу агъзурпе иса Арсугъарин мазгит хаб цIаекIиластти батIар акьуне. Сефер-ХIаджин кьабахъай хьуне Махмуд-ХIаджи. Махмуд-ХIаджира хIа Iелим и.

ЯгIайин ягъара ме мазгит лиханди аме. Къулгун акьас, гIилми хурас бицIиф хIаф ачаве.

Наибет Гасукаева