Хъуттудурфуна атасра вере ус дава хье ме ус. Дагьарарин арайиъ ая Агъул район, гьер са угъал, ибхь угъудегьен ккерчIуна хIа гъванар адаве рекъерилди рукьуна, е инсандис е машинис вере рекъракегьей илгвандава. Агьал Агъул райондиъ ппара загьмат дивая хье Мамраш-Ташкапур – Араканский мост агъа рекъюхъас 57 – 60 агъзур митIрин манзили. Мисаъ аркьа курарихъас ахъакьуне райондин ДЭПдин хIатти Омар Магомедова.
«ЯгIайин ягъас мисаъ акьуная рекъ IирIе акьубан курар, 2 агъзур митри алийиная асфальтра. Хъара ме курарихъай барамбарди батIар аркьая Iу мугIра, кIенаас вартт цIуьппе аркьая мугIарин багвар, кичикIуная хьеттар вере турбабур, хIезурвелар аркьая цIуьппе акьас рекъерин ккерчIва къирагъара. Хъара ме рекъуьн манзили ахъихьая бетонный блокар хье инсанарин эхIттият бадалди, ирхIай ая цIае рекъерин знакара, Iу пай аркьа джагвар хатIра йирхIасе рекъуьк. Гьер ягъа мисаъ кар аркьай ая 15 спецтехника. Ме башламиш акьуна курар кIиркIвас пуна икьрар акьунафе октябрдин вазалан ахирари», — ахъакьуне ДЭПдин хIатти.
Ме манзилиъ аркьа курар кидавай хъара хье мисаъ батIар аркьая Дулдугъаас Буршагъди вере рекъра. 5 агъзур митIрин манзилиъра IирIе аркьая мисан рекъра, ккерчIу усариккра, мугIарикк цалар ккеркьая. Мисаъ гьер ягъа кар аркьай ая ДЭПдиъ курар аркьая инсанара, хъара чиппис Iу манат хьас кьиматигьас кар аркьа завал акьу бригадабура ая. ХIапай курар мебури акьуная, гьал ккиркIубарихъди багу вея. Дуьяйин гьавайи мугьлат йихаб дахира ккиркIвас пуна мункинвел ая.
Ме кар бадалди ушу хIефттайи хье райондиди адина уйи министр транспорта и дорожного хозяйства Джамбулат Салавовра. Министрди ахтармиш акьуне джалла усариъ аркьая курар, хабди акьудегьен, акьас кимедегьен курарис кьиматра йине.
«Зе багухъас зас пас кканде чугъсагъул джаллайисра гьеме хье райондин рекъерин курар бегьем акьас чIал гьучихьунара, гъил гьучихьунара кумак аркьаттарис. Хьин фикир акьуна кканде хье халкьдинра, хье райондин иджвелихъас», — пуне Омар Магомедова.
Гьалдис гьете 2019 исахъас хаб хье райондиъ ара-ара аркьай батIар акьуная 12 агъзур митIри рекъуьн, 44,5 агъзур митIрихъас 57 агъзур митIридегьен рекъуьн манзил. Ме вере 2023 исас «Безопасные качественные дороги» агъа нацпроектилди фикирди ая райондин ценрайиди рукьуна батIар акьас рекъ. ЙиркIурал акьасе гьеме машинарин рекъ Мамраш-Ташкапур – Араканский мост агъаф э ке ирхе рекъ хье багухъди гъареф. Ме рекъуьас 8 районариди вес мункинвел ая, хъара садтти сад э хье райондидира гъареф.
