Гьава суварин кIилар,

Гьамишанди дифар алеттар.

Суварин ухьтан тукар,

Вахтуни атас дахьуттар.

Гьава суй хьеба хьурай,

Улерис аргвай чугас.

Варха рекъ багув хьурай,

ЧIаларин гъургъай чугас.

Укуни ае тукар

Чвас канне дакканф фи э.

Тукарик кие цIабар

Чве мурад-матлаб фи э.

Я руш, вун фас хIалаке.

Сувал алеф кулаке.

Адина укьутарис

Жаннатдин багъ гьазуре!

УрсурагIан суе сур,

Хьибуд хъай атас дахьеф.

Мичуринан ире гьеч,

ЦIиял хъай Iуьтас дахьеф.

Булахин кIилил кканде,

Дардарна- гъамар акьас.

Садафин юркIвар кканде,

Фикирар фачадатас.

Лекар ярхIунде тукар,

Вахт дахьуна рукьая.

Гьава суварин джейранар,

Ул ярхIуна гулая.

Див гьел вас ягъур хьурай

Хьеттин хулар хуппа хъай.

Алайши багъарикес

Вас ккане мурад хьурай!

Ул дарукьа заварилас,

Айрупаланар вея.

Заву ае гIадари,

Вархайилас нурар ицIая.