Гьеме хIефттайин тталат ягъа Махачкала шагьурдиъ ая Iисса пайгъамбардин ттур але духовный центрдиъ хьуне лап хIа мавлудин маджлис. Ме мегIрака Агъуларин халкьди, райондин хIа имамра кIилил ай арайил акьуне хье гIешкъ але пайгъамбар ху вазалан хатириас. Арайил акьубан ишттаракчибур э РД – йин Муфтият, кIилди районар, хье райондин хIаф Закир Каидов, агъуларин джемеIет, джалла хье имамар.
Адесра ме мавлудихъди ацIуна джемеIет адина завал хьуна уйи. Мисаъ завал хьудегьен инсан агугуна, агъуларин миллатин йиркIвара кехIей лап гьава хьуне. Хье хIуькуматин гьер мурттариас адина уйи агъулар. Фикир вей уйи, яраб гьемидегьен ппара эгьан хье бицIи халкь.
Ме маджилисин мегIнара гьеме э, хье бицIи халкь завал акьуна, мебурин йиркIвар шад акьуна, мебурин садвел арайил акьуна сад – сайил алдуьхьес акьуб. Ме кардин рекъуьъ гьер са инсандин чIалунра, гъилинра кумак лап хIа э. Фас пучин, мишттин мегIрака са-lу инсандифас арайил акьас верефттава. Ният ая инсанар ппара кканде. Гьелбетта ме Раби уль-Авваль ваз ккиркIвасттегьен мишттин маджлисар ме мазгитаъ гьер хIефттайи са миллати акьасе.
Инсандин Iуьмур ппара тамашин зад э. Ме ке хIа савкьат э тIабиIети гьер са инсандис багъиш акьунаф. Фикир акьугуна, ппара инсанар алайшуна ая дуньяйилас. ЯгIа айчин, багагь адава инсан, кIина дуньяйилас ушухаб, илгванф е иджеф и пуна, е дахьучин Iаф и пуна ттур э. ДехIела э инсан алучIаф, вахтт ами чиппифас вере иджвел акьас, саваб къазамиш акьас.
Саваб къазамиш акьас кканеттис ке рехIетин рекъ э, гIеджизарис, иттаттарис кумак акьуб, садакьа, нафакьа пай акьуб. Ппара савабин кар э аркьа мазгитас пулулди е герек иде шейэрилди кумак акьуб, мавлудигI учин гъилихъ хъая Iу манат гIачихьуб. Миштти идегуна, цацра ттиъра хье агъул халкьди зайдайи йиркIурастти гьертти учифас вере кумак акьуне хье джемеIетин ке хIа мегIрака арайил акьас.
Ттиан маджлисис джемеIетин кумак кидавай, хIа кумак акьуне Махачкала шагьурдин хIаттин садпе заместительди Рамазанов Назим Гаджиевича. Мисаъ завал акьу пулун 35% йине ми. Уч Назим Гаджиевич Буршагъаас э.
Ппара ушуна уй мич кардин кумакк аркьаттара, Типпигъарин хIуриасра ушуне дирибаш дишагьлибур ямагар акьуна, агьийина кIил-кIен акьас.
Ишттарак акьуне мегIракайил хье Типпигъарин хIуриъ бицIиттарис Iераб чIалан гIилми ягIар аркьа гIелим Кьубай Раджабовичра. Ппара кьабул хьуна уйи Кьубай Раджабовичас ме маджлис. Ми ахъакьуне мисал ахъихьу батIар нашидарихъас, акьу кIур ихьуна агъдива савкьатарихъас, агвар акьу театральный сценкабурихъас, агъул миллати авалдин заманабури ишламиш аркьа гIедатин шейэрихъас, мисал гъургъу гIелимарихъас.
«Ме хIа гIелимари ацIуна вегIзабур ахъакьуне, Маджлисин кIил гъаре МехIемадрасулара учин кар зурбадалди акьуне. Хъара кьабул хьуне зас бицIи шибер — Алиева Софияна, Рамазанова Талима. Мебури аликIуна агъул миллатин кунара батIарди ахъакьуне шаирар, хье агъул Ватандихъас, нуьхIубат-хIуьлматихъас, бабахъас, агъул чIалахъас. Зе йиркIв хIа э хье агъул миллатихъас ислам кьабул акьухаб сара фаддихьуна чиппин дин-тIегIет аркьай Iуьмур гъарехIела. Хьин Iешкъ але пайгъамбардин уммайикес идехIела. Мисал акьуне дуьгIа Аманатра хье дегIвиди вере Аскерарихъасра», — ахъакьуне Кьубай Раджабовича.
Ме маджлисилди ушу шиниккваригI гIай уй Кубутаев Осман, Ибрагимов Курбан, Исламна Исмаил Магомедовара. Мебурифас хабар гъушугуна, шиникквари са сесуналди джуваб акьуне, чиппис фидегьен кьабул хьунчин ме мегIрака, фишттин таджриба йинчин чиппис мисал гъургъу хIа гIелимари. Ппара шадтти уйи мебур.
Хье райондин имам Юсуф ХIеджира лап хIа чугъсагъулар пуне ме маджлисилди адина учин гъилихъ хъая Iу манат гIачихьуна, кардин кумак акьуна, хъуттурфуна, йиркIв алийина кканчира учин пай кихьудегьен инсанарис.
Агъул райондин администрациас арайил акьуна уйи мич вере инсанарис ерхьид маршруткабур, Дербент шагьурдиас Iуд хIа автобусар.
Са чIалалди, гьертти учифас вере гъил гьучихьуне.
Мишттин маджлисар гьалдисра ппара акьуна кканеф и. Хье кIилди дунья идедегьен далгъуная бицIи халкь завал акьуна, сад-сайис ая ус ягIар акьуна, мебурин арайиъ нуьхIуьбат, хIуьлмат алтухъ акьас.
Аллагьди кьабул акьурай мебурин загьмат! Хъара кьуватра йирай мишттин иджвелин курар алтухъ акьас!
Салихат Малагусейнова
