Агасиева Ума Рамазановна хеф1952 иса Бедухъарин хIуриъ Агуларин райондиъ. Махьттабра иджи хуруна кIиркIухаб, ушуне ге хурас Буйнакскдиъ ая педучилищейиди. Гисаъра ги идже багухъасдала агвар акьундава. Хурубар кIиркIуна адихаб, ушуне Ума Рамазановна шувас. Гин шувас агъафи Агасиев ХIесан Гаджирамазанович. Ге хIа курарил алди уйи Агъуларин райондин исполкомдиъ. Ума Рамазановна башламиш акьуне Типигъарин хIурин махьтабиъ кар акьас бицIи классарин мегъелимвелди.
Сае мукьариъ Ума Рамазановнайи кар акьуфдава. Гин трудовой книжкайикк са мукь э кеф ги кар акьувусан. Ме иса 50 ис э Ума Рамазановнайин махьттабиъ кар аркьай. Ппара шиникквар гин гъиликкес ушуфе , амма джаллабур гин йиркIураъ аме. ГIешкъуни учин дарсар гIарефе Ума Рамазановнайи.
«Завас кар даркьай экьвас хьасттава. Зас ппара кканве шиникквар. Зе кара зас ппара кканде. Зун мусра кIилилас алдихьуфттава зе дарсар. ГIешкъуни гъарефе зун зе дарсар. Фуш адайчина, гьетихъасра гъарефе зун зе дарс. Зе ппара гIешкъ айя бицIи шиниккварис дарсар ес», — агъа Ума Рамазановнайи.
Ума Рамазановнайис учин кар иджи ягIа. Ппара тамашин дарсар гъа ги. Гин дарсуниъ шиникквар сакинди, йиркIв алийина эркьва, иджи гъавурдиъ ихьахIела чаб.
Ума Рамазановнайи гьер джурайин дарсар аркьа. Ги аркьа: «Урок-зачет», «Урок-путешествие», «Деловая игра», «КВН», «Поле чудес», «Смотр знаний», «Тестирование», «Проектная деятельность», хъара гьер джурайин дарсар. Гишттин дарсар ппара Iайи кканве шиниккварис. Гин дарсариъ ппара фикир акьас алчархьа ученикарис, ппара задар ягIарве. Шиниккварин дадар-бабарисра ппара кканве Ума Рамазановна. Ге дадар- бабарихъайра ппара гьучархьа, ахъаркьа гебурис классин дардибалабур.
Учин мукьуф Ума Рамазановнайи ирцIанде джуре мегIелимарисра. Ги гъа джала мегIелимар, директор, завуч ахъекьуна дарсар. Гин дарсарин ппара хьа гафарар аркьа гин коллегабури.
Иджи кар аркьахIела, ацIуна грамотабура йиная Ума Рамазановнайис. Гьер хIаягъа агъламиш аркьай ве ме мегIелим.
2017 иса Ума Рамазановнайи акьуне проект «Окружающий мир» агъа дарсуниас «Путешествие по родному краю» агъаф ( 3 классин). 2016 иса проект «Моя малая Родина» агъаф (1-4 классин).
Учин мегIелимвел кидай, Ума Рамазановнайи ликIенде шаирар агъул чIалалдира, Iуьрус чIалалдира.
2013 иса газитиъ «Агъуларин хабарар» адихьуне Ума Рамазановнайин садпе шаирар. Гьетегунан хаб гин ацIун ликьибар айя газитиъ.
Iуьмурдин дараджабура иджи ая Ума Рамазановнайин. Гихъ хъайя гIуьфу рушна са кIиркI. Гебури джалабури хурасра акьуна, цIакинара акьуна, Iуьмурдин рекъуьъ ихьуне Ума Рамазановнайи.
25 январьди Ума Рамазановнайин вейя 70 ис (юбилей). Джалла мегIлимари, ученикари, редакцин работникари, багункIилари Вас мубарак хьурай агъайя, Ума Рамазановна, ве хе ягъ! Ве джандиъ сагъвел хьуна, йиркIурас рехIетвел хьурай!
Нафият Шамсудинова
