Дагъусттандин Республикайин Правительствойин Председатель Абдулмуслим Абдулмуслимова иштараквел акьуне мегIракайиъ цIае мясокомбинат аркьа усаъ. Ме аркьаф Кизилюртовский райондин Кульзеб агъа хIуриъ.
МегIракайил хъара адина уйи Кизилюртовский райондин хIаф Рустам Татарханов, Народный Собранин депутатар, райондин гьер идарабурин хIаттар, хъара джуреттара.
Дахъуна мегIракара, премьер-министрди Сергей Меликован багухъас салам йине адиная гIуларис, хъара баркаллагь пуне ме проект арайил акьуттарис.
Ми ахъакьуне мишттин проекторин гереквел Дагъусттандис. Республика гьемишан удигь гьаверефе хIуппар-малар ухIубариас, мебурикес аркьа сурсатариас.
Абдулмуслимова пуне, региондиъ ая кIилди Российиъ ая гIуьфу паюнин са пай хIуппаринра цIегьерин, хьибу паюнин хьеяринра, хIуппарин яккун. ХIа маларин сан ая 940 агъзур мал, хIуппарна цIегьер — 4млн, пеIерна, къазарна урдагар — 4 агъзур.
Кабминдин хIаттин чIаларилди, ме отрасль ппара лазимдинф э хIуькуматис. «Малар ухIубан бина мус хьучира фитIуна афе республикайиъ вартт хьубахъай яккун. Ахиран исари акьуная 9 малар рукка цехар, хIуппарин яккар ишламиш акьуна натиджабур хъучатас 200 тоннайилас вартт са ягъан арайи.
ЯгIа хьин арайил аркьая аяттарикес ке хIа яккар арайил аркьа цех 5 агъзур тонна яккун иса аркьаф ООО «ДагМясо». Ме проект арайил аркьаф АО «Росагролизинг» кумакилди э, ме кардис ми фатуная 1,5 млрд руб.
Республикайи учин багухъас ме цех акьас йиная 17 гектар джилин, Кизилюртовский райондин администрацира кумак аркьая мебурис.
Ме проектин садпе этапиъ акьасе малар рукка цех, 50 хIа мал, 700 бицIи малар са сменайин арайиъ; акьасе колбасабур, тушенкабур, хъара джуре сурсатар.
Iудпе этапиъ акьасе са сменайиъ ата неккарин, акьасе хьеяр гIалиркьан цех, акьасе ирккарикесна-яккарикес аркьа гIур аркьа цех», — пуне Абдулмуслимова.
Ме акьудегьен цехари кар акьасе кIилин истти. Ме хьасе хIуькуматин идара.
«Ме проект арайил хьухаб, алтухъ сасра усариди гъасттава хье малар, хьасе мисаъ 130 инсандис кар аркьа мукьар. Гьер малар ухIа инсанарис хьасе мункинвел чиппин малар чиппи руккуна арайил акьас.
Мубарак хьурай джаллабурис ме аркьая цех!», — пуне премьерди.
Ме аркьая кардин гереквеларихъас, лазимвеларихъас гъургъуне Кизилюртовский райондин хIаф Рустам Татарханов.
Хабди Абдулмуслим Абдулмуслимов, хъай сасра мич адиная гIулара, аликIуна каскабура, гъушуна кIетIабура, ихьуне садпе гъван аркьая цехунис.
Хабди кабминдин хIаф ушуне ахтармиш акьас ме цех аркьая джил. Гъургъуне мич завал хьуная райондин джемеIетихъайра. Йине мебурис чIал вере вахттари мебурис герек иде социальный обьектара акьасе пуна.
Ме цехуниъ акьасе малдинра, хIуппанра яккар кканчина мерккв акьас, кканчин ругъас акьас, акьасе колбасабур, гьер джуре консервабур, Iуьччу рудар, акьасе гитанарина гъурури Iеле кормабур.
Ме проект арайил акьасе 2024 исан ахирарис.
Луиза Гусукаева
