Абдулмуслим Абдулмуслимова социальный объектар гъадива пешакурарис вахтт ами хабар йине, гьер са джигагь учин вегIдайи дала кьабул акьасттава пуна.
ЦIесадпе апрельди совещание хьуне. Ме мегIракайил гъургъуне Дагъусттандин хIатти, РФдин оборонайинра, просвещенин министрари къулара дивуна арайил акьуная икьрардихъас. Икьрардиъ агвар акьуная ме курарин иде – дава мегIракабурихъас. Ме мегIрака кIили файшуне Дагъусттандин Правительствойин Председательди Абдулмуслим Абдулмуслимова.
Мисал иштарак акьуне ме социальный джигагьар гъадивасе пуна чиппин гардандиъ фацу усттабурин идарабурин хIаттарира.
КIвал акьасе, гьеме исан хьибцIурпе мартди Дагъусттандин Республикайира, Российин Миноборонайира, Минпросвещенира къулар дивуне протоколдилас. Гьеме протоколдиъ агвар акьуная «Образование», «Демография» агъа нацпроектарин рамкабурилди аркьая гIилмин идарабур арайил акьуна ккане вахттар.
МегIрака хъучучIагуна, республикайин премьер-министрди кIвал акьуне, «Образование», «Демография» агъа нацпроектарин рамкабурилди ттиан иса алиланди ая гIуьфцIурна муяд гIилмин джигагьар, мебурикес гIуьфцIур э махьтабар, къана якьу агъзурна гIуьфу вершна муйцIурна муя шиникквдис мукь хьасе. Муядра бицIи шиниккварин садикар. Мебуриъ мукь хьасе са агъзурна хьибу вершна ерцIурна са мукь.
«Ме къулар диву икьраригI гIачихьу джигагьарикес са пай, ис – исахъ хъучартай, вахттуни арайил дакьуна, хаб гIачихьуттар э. Сара мишттин кар кьабул акьасттава чин», — пуне премьер министрди.
Абдулмуслим Абдулмуслимован, чIаларилди мегелай цIуппи алгъузанасе акьуна ккане курарин вахттар кьана дакьас. Кьанабур акьучин, джувабдарвелра ппара хьасе.
«Нагагь вахтт алттушуна багьа хьуная пуна, хIа кьиматар кканди аркьая курар идехаб, мишттин ахттилатари сара кар акьасттава. Багьа акьуная гьер са манатихъас чун гъасе хIа джувабдарвел хIуькуматин гIедатарин кьайдабурилди. Конкурсарин икьрарилди пулар чун гъушуная, гьал ме пуларин хабар чвавас э, вахттуни ишламиш фас акьундава пуна. Чвавас акьас аттдарукьа курар садра гардандиъ фамарцана сайира», — пуне министрди ме курар аркьая усттабурин вакиларис.
Ке герек иде доклад фай гъургъуне ЖКХйинра архитектурайин министр Артур Сулейманов. Ме ахъакьуне чиппин идарайин пешакурари фиштти кар аркьай ичин ме гIилмин идарабур вахттуни арайил акьубал алгъузубан рекъуьъ.
РДйин Минстройдин хIатти хабар акьуне, къана хьибудпе исан ахир верегунас кардик кихьуна кканди ая ягъцIурна муяд гIилмин идарабурикес. «КIилди хье республикайиъ джигагьар гъадивубан вахттар бегьемди чIукь акьуная. Акьу джигагь кардик кихьас ве хьибу хIефттайин арайиъ. Ме кар асуллу э ахттигьарарин кIеджарин пакет дузди хIезур акьубалас.
Джигагьар аркьая подрядчикари чиппин кар ккиркIвастти хIезур акьуна кканде чиппин кIеджар, идарайин лицензия аркьагуна мушат дахьуна вахттуни арайил хьас. Дагъусттандин Правительствойин Председательдин тапшурмишилди гьеме исан садпе сентябрьдис арайил акьуна ккане джигагьарин сан республикайин хIаттихъди рукьас акьуна кканде ме ваз ккиркIвагунас. Миштти идегуна, кIеджарна джигагьар хъай садихъди арайил акьуна кканде», — пуна фикир ачатуне Артур Сулейманова.
Ме кидавай, Сулейманова кIвал акьуне ме курарил федеральный порталиас алгъузуна ягъди уликк ккеяф.
Ме гъургъуна ккиркIухаб, премьер-министрди гаф йине гьер районарин хIаттарис, курар аркьая усттабурин вакиларис.
Мебурира, чиппин нубати, ахъакьуне чиппи арайил аркьая джигагьар фи кьайдабуриди рукьуна айчин, сур махьтабар фи багьанабур ай кьанайи хъучархьас ичин.
МегIракайин ахирахъди Абдулмуслим Абдулмуслива хубджи тапшурмишар акьуне гьер вице-премьерарис, гIилминра гъадивая джигагьарин вакиларис, ме курарин вахттарин джувабдар инсан гIаттив пуна.
Салихат Малагусейнова
