ХIа Гъалибвелдин 80-цIур ис къаршиламиш акьубан шартIарихъас Сергей Меликов кIилиъ ай файшуне Республикайин «Победа» агъа организационный комитети мегIрака. Мисал сур мегIракабурихъас ахъакьуне РДйин Главайин Управленин гIанабагулин сиясатинра мукьуйин самоуправленин хIатти Наталья Беламирзаевайи.
Ке лазим иде суаларигI гIая ватанагьлибурин, шиниккварин джигьиларин ватанперасвелдин тарбия, Российин тарих йиркIв фай ягIар акьуб, тарихдин фикир ухIуб, Ватандин аскерарин игитвелдин дженгар йиркIварилас гьадатуб. Ке удигьай: удигь кIил акьуна, фикир йина кканде Ватандин ХIа дегIвин ишттаракчи ветеранарис. АктивистаригI гIачархьасе, ме мегIракабуригI чалишмишди ишттарак акьу «Память гор» агъа, мукьуйин джемеIетин ветеранский организацибурин отделенибурин, Ватандин аскерарин хизанарин комитетин, Юнармия, Движение Первых, волонтёры Победы агъа джигьиларин организацибурин ишттаракчибур. КIилдин рекъ э — дегIвин исари кIидегьен аскерарин ттурар гъагьалцай асирарилди мебурихъас фикир ухIуб.
ЙиркIураъ ая аскерарин некьварар, машгьур дженгунин аллеябур, авадан акьуб, хъара Ватандин ХIа дегIвин ишттаракчибурил, мебурин гIунарихъ загьмат дивуттарил, ме дегIвиъ кIи ишттаракчибурин ашкIинарил аларуцуб. КIилин республикайиъ кIили гъасе экспозицибур, выставкабур, флешмобар, ватанперасвелдин акцибур, концертарин программабур, шадвелдин мегIракабур. Гьемишттин акцибуригI гIахьасе: ГIедат иде «Вахта Памяти» агъа ке хIа акция, ДжемеIетин тарихдин «Диктант Победы», «Знамя Победы», «Георгиевская ленточка», хъара Бессмертный полкунин гьер форматар. Джалла шагьурарин, районарин, хIурарин гIилмин идарабуриъ, махьтабариъ «Урок мужества» агъа дарсар гъасе.
«Великая Победа в памяти поколений» агъай республиканский эссе конкурс акьасе, хъара джуре мегIракабура хьасе. ХIа пай муниципалитетариъ, Гъалибвелдин Ягъас бахш акьуна арайил акьасе концертар, спектаклибур, гьер джурейин спортивный мегIракабур, гьемебуригI гIахьасе «Кубок победы» агъафра. Гъалибвелдин муйцIурпе иса шагьурар районар ухьтан акьасе ме вакъиайис бахш акьу баннерари, электронный шитарин заставкабури, видеороликари.
Салихат Малагусейнова
