Ме мегIракайигI хъара ишттарак акьуне «Иман» благотворительный фондунин хIатти Фируза Керимовайи, Махачкалайин хIатти Юсуп Умавова, Дагъусттандин союз писателярин председатель Марина Ахмедова — Колюбакинайи. МегIракайихъ хъуттурфанас адина уй Махачкалайин хIа пай джемеIет, столицайин гIулара. КIвал акьасе, удигьай Сергей Меликова пуна кьабул акьуна уй маслихIет Дагъусттандин халкьдин назумчин ттуранихъ хъая парк гьалдингъилди цIае акьасе пуна. Ме паркуни Аварскийна Кумыкский театрыбурин арайиъ хьибуд скверар кикъвас акьуная. Ме курарис пул ачухъ акьуне меценатарин средствабурикес, Дагъусттандин сенатор Сулейман Керимова ачухъ акьуттарикес. МегIрака хъучучIастти Сергей Меликовра гIулара аларуцуне цIае акьу паркунил, хъуттурфуне культурно-спортивный площадкабурихъ. Мисаъ духIуба акьуная кIилди тротуарарин плитка, цIае акьуная Iекварна балясинабур, цIае дорожкабур, скамейкабур акьуная, кIурар, тукар, березовая роща. Шагьурдин пляжилди вере усаъ цIае мугIра акь уная. «ЯгIайин ягъанихъ ппара гъузуна уй: Махачкалайин ке батIар мурттарикес сад, ахира батIар хьуне, цIае ттур, цIае куц акьуне. ЙиркIурастти кканде хъара ме ус ухьтан акьас. Фас пучин ме ус хьес джаллабурис багьа э», — пуне Сергей Меликова, мегIрака дархъагуна.
Региондин хIаттин ахттилатарилди, ме кар хъара хIа ишан э, СтIал Сулейманас бахш акьу иса ме зурба шиирарин усттайин ттуранихъди дахъу хIела.
«Шаирар гьер джуребур аве. Сур чаб кIи вегIдайи чиппихъай чиппи ликIиттара луькIе, сурис чиппи ликIиттари абада далуькIе ттур арта. Гьаме Iудпе джурейикес э хье шаир СтIал Сулейманра», — пуне Сергей Меликова. Сулейманан Iуьмурдин кьадар сифтта кIилиас ахирахъдегьен дуьшуьшаринф хьуне. Советский Союздин шаир, публицист Николай Тихонова михъас мишттин чIалар ликIини: «Ппара читин Iуьмур агуне ме инсандис, амма ме читинвелари ме аргIундава, хъара вартт акьуне». Гьунарлу шаирдин йикIураъра кехIей адавуй инсанарис уч, учин шиирар гьемидегьен багьа хьасе пуна. «Е кьалам е мурцI фадай кар ар кьа СтIал Сулейманафас учин ке зурба фикирар чIаларилди джемеIетихъди рукьас акьас вей уй. Ппара надир инсан хьуне ме: Iекьуллу, камаллу. Гьемиштти идегуна хье йиркIвариъ Iекве нур суман ахьасе ме те вахттарин фикираригI», — хъара хъучихьуне республикайин хIатти. XX асирдин Гомердин шиирарин лазимвел хье вахттунира гулуна адава. Фикир ве хьин шегьидар ий пуна мебур арайил аркьа вахттунин вакъиабурин. Мебури хьес ватанперасвел, Ватанин кканхьун ягIар аркьа. Ватанперасвел Iари чIаларилди дава агвар аркьас вереф, курарилдира ве. Ме кардин субутвел э дагъусттанагьлибурин агалкьунар гьер рекъериас: гIилмин, культурайин, спортин, хъара СВойин игитар. Сергей Меликова ппара хIа чугъсагъул пуне Сулейман Керимовас, реконструкцис кумак акьубан, хъара джуре иджвелин курар акьубанра. «Ватанагьли, хье хIа класикдин тезка, сенатор хъара меценат Сулейман Абусаидович Керимова ппара гъил гьучихьуне зурба гIешукьин ттур хъара вартт акьубан рекъуьъ. Ме парк шагьурдин джемеIетис багъиш акьуф, Сулейман Керимован ппара иджвеларикес сад э. Зе фикирдилди гIеламатин ухшарвел а яме удара Дагъусттандин зурба кIиркIарин. Мебур Iудара гьер учин вахттуни лап йиркIв фай хъучавея ватандин читинвеларихъ», — пуне Сергей Меликова.
Региондин хIатти ахъакьуне Эффенди Капиева гIешукьихъас ахъакьу ахттилатар. Сагелай ме файдине Сулейманас агвар акьас те вахттуни ттур ая «Огонек» агъа журнал. Мисак кей уй шаирдин ишкилна шиир. «Хъуттурф фидегьен батIар ишкил ичин, мубарак хьурай вас Сулейман!», — пуне Капиева. ГIешукьи ме ахттилат иджи ун дахьутти суман джуре ахттилат ккийине. Эффендийи хабар гъушуне: «Вун шад дум е журналиъ ихьуттил? Нагагь захъас гьемиштти ликIина уйхаб зун шад хьуна кIеси». Хубджи гагьди буIуна джуваб йине шаирди: «Гьелбетта зун рази э. Мисаъ ихьуна аяхаб лайикь идеф хьасе. Амма ме кардис лидегьен фикира йина ккандава. Iемал дахьуб э кканди аяф, гьер са кар йиркIурастти хьуна кканде. Iари гьемиштти хьучиндала джемеIети чугъсагъул пасттава». «Сулейман Абусаидович Керимован кIилди курар лап йиркIуран даринариас э. Кумак аркьайчирна, батIар аркьайчира Маккайиди гьикайчира. Фи акьучира са ишкилра кехIей авекйдава «Огонек» агъа журналиъ. Тамашин хIеялувел хъая гьемидегьен учин халкьдис иджвелна хIуьлмат аркьа инсандихъ. Микес иджвел киркьудегьен инсанар мусс хьучира мин багулив фахьасе. Дагъусттандира нае читин вегIдайи хьучира мисс кумак акьасе», — гIерз акьуне Сергей Меликова. Дагъусттандин хIатти учин хъугъуб хъая пуне ме парк дагъусттанагьлибурира ми чади гIуларира шадвелилди ишламиш акьубахъ. Махачкалайин мэр Юсуп Умавова мубарак акьуне гIуларисра столицайин джемеIетисра ме парк дахъуб: «Ме лап зурба савкьат э шагьурдин джемеIетисра, мич вере гIуларисра хъара багьа э хье зурба шаирдин фикирна ттур ухIуб. Чугъсагъул хьура гьемиштти тегIдевелилди са бицIи вахттуни мидегьен ухьтан мукь арайил акьу усттабурис, архитекторарис, агротехникарис. Ме паркуни хье шагьурдин агуб хъара ухьтан акьуне». Шагьурдин джемеIетинра учинра ттуранихъас чугъсагъул пуне Махачкалайин мэрди Сулейман Керимовасра «Иман» агъа благотворительный фондунин хIаф Фируза Керимовайис. Ме мегIракайил хъара гъургъуне Дагъусттандин писателарин Союздин председатель Марина Ахмедова Колюбакинара. Хъара мисал гьеме ягъа хьуне гьер джуре бехIсарин мегIракабура. Хъара ме ягъа Аварский театрдин удигь фонтанра дахъуне.
Салихат Малагусейнова
