«Якьу исан удигьай Российин Президент Владимир Владимирович Путинан маслихIетилди Дагъусттан Республикайин хIаф акьуне генерал — полковник, хIуькуматин, военный, сиясатинра гьунарлу инсан — Сергей Алимович Меликовакес. Тарихдин гьер са давур учингъилди читинф ве. Амма гьеме якьу исан Iуьмурдин рекъ хье республикайиъ гьер багварихъас ппара читинвелдинф хьуне. Читинвеларихъ хъуттурфуна нагагь зурбавел хъай, йиркIв фай, хIел ягIай хъучавере инсан дахьухаб кIил аттивас хьасттавуй. Хье бахттунис Сергей Алимович лап гьемишттин инсан хьуне. Зун гьалдисра пуна уй, ме кардил хьуна, Дагъусттандин хIаф читинвелар вахттунилди тегIди хIеларкьа рекъериас ушундава. Ме учисра учин багулив кар аркьая кумакчибурисра читин, амма вархайилди иджвелин рекъ гIаттивуне Дагъусттандин аваданвелдин суалар хIел акьас. Мебур ке удигь кIил Республикайин гIилмин, сагъламвелдин, хьеттин, Iекварин рекъерин суалар э. ЦIайи акьу, аяттар батIар акьу вершарилди махьтабари, духттурханабури, дивудегьен хIа хьеттари, Iеквари ппара кумак акьасе Дагъусттандин халкьарин Iуьмурар авадан акьас.
Чин хъара давам аркьая са джалга миллатаринра республикайинра проектарна программабур. Ме курарил алгъузуна мебур арайил аркьая Сергей Алимовича. ХIуькуматин хIаттинра ппара эхIттиб хъая михъкканедегьен лазим иде пулра хъучартас, джуре кумакаринра майл йис. Федеральный центрдин кумакилди, хъара чиппин доход алтухъ хьу велдиласра асуллу хьуна, ахиран гIуьфу исан арайиъ хьевас аттрукьуне респпубликкайин бюджетин кьадар 1,6 дегьенгелай вартт акьас. Региондин валовой продуктин кьадара гьалдис триллион манатихъ хъучархьай вартт хьуная. Ахиран исари республикайиъ кардик кихьуная ерцIур цIае махьтабар, мебурикес къад ттиъ акьуттар э, ерцIурахъ хъучархьай дахъуне бицIи шиниккварис садикар. Духттурханабуриди са агъзурна гIуьфу вершалас вартт цIае оборудованибур фатуне. Гьалра гъадивая цIае идарабур, алтухъ аркьая сельхоз натиджабурин кьадарар, авадан вея рекъерин инфраструктура. Ахиран якьу исан арайиъ Дагъусттан духIуба хьуная туристарин рекъуьасра: гьал хье республикайин ттур фацугуна гучIар шакар хъатай андава гена тамаш хьуна инсанарис адес канве хье мукьар агвас. ЧIирхIе фикирар вей андава, фикирдиъ авереф гьал хье батIар сувар, дагьарар, хIуьлин къерехар э. ЯгIа багагь республикайиъ кардик кихьасе туристический цIае комплексар. Хуппай хъара ппара туристар адесе. Кьандира кехIей ме ахттилатарихъ ппараттархъугъайдавуй, Амма зас ягIа, Сергей Алимовичан мусс хьучира хъугъуб хъай уй Дагъусттан авадан хьубахъ, мин гIулар кьабул акьубан зурбавелдихъ, джемеIетин йиркIварин иджевеларихъ. Iуьмурдин рекъуьъ гьер джурейин вакъиабур ве, шадвелинттар, пушмалвелинттар. Мус хьучира духIуба даркьай йиркIвариъ ухIуна кканде хьес хье хIададари йи тарбия, ягIар акьу курар — садвелна дусттвел ухIуб, гъавурдиъ архьуб, читинди аяттин гъил фацуб, сури сурис кумак акьубалди чиппин арабур хъара цIуппе акьуна кканде. Садвелди эхIттибна хъугъубра хъихьа, ме курари кумак аркьа кIилдин инсандин Iуьмурдин аваданвелдис суман кIилин республикайин аваданвелдисра. Гьеме лозунг фай э чин ме исарди каср аркьай аф. Че дамакъ э ватан бадалди учин руьхIра джанра алихьуна йиркIв фай кар аркьая инсандихъай къвал къвалуъ ай аруцай лихуб. Ях удигьди, Сергей Алимович! Чинра вахъай весе, рекъера духIуба даркьай, лекра яваш даркьай!» — Дагъусттан Республикайин Правительствойин Председатель А.М.Абдулмуслимов.
Салихат Малагусейнова
