Хье Дагъусттан уч ая мукьуйихъас
хъучучIуна тамашин республика э. Тамаша э мин суварин, дагьарарин арайиъ джинихьувел. Зе фикир ве, яраб ме кьасусттира джин акьуф э гьан, алтухъ инсанарис агуна улин дахьас пуна. Ме гьава дагьарарин арайиъ учин дагь заманабурихъас
мич ая гIедатар, инсанарин зурбавел, игитвел, нуьхIуьбат, хIуьлмат, баракат дагулуб бадалди. Фидегьен асирар алттушучира, мебур хьудегьен аяф аягъилди афухIуна, чиппин кегъархьая несиларихъди рукьас акьас. Гьемиштти хьасра э.
Магьа ягIара кехIей ацIуна ая хье ватанагьлибур. Чиппин Iуьмурна джан гIегвал давай зурбадалди чиппин бурдж ирцIанттар хIуькуматин удигь. Мебурин ке хIа ният ватанперасвел э. Хье Аскерарин зурбавелди Ватандин садвел ухIая! Гьемишттин зурба аскерарикес сад э, Магарамкентский райондин ЦIелегюнарин хIуриъ яшамиш вере, уч Агьул шуй иде Шабанов Маджид Шабанович. Маджид Шабанович са агъзурна ерчIу
вершна муйцIурна гIуьфудпе исан цIемуядпе майди хуне Магарамкентский райондин ЦIелегюнарин хIуриъ,
ШагIбананра Байранкъизан хизандиъ. Хизандиъ мебурин хьибу кIиркIна са руш ая. Уч ке бицIиф ичира, ме шиникквди ами
ппара Iекьуллу и. ХIа вередегьен хъара зурба кьехIел хьуне. Iу агъзурна муядпе иса икьрар хъитIуна ушуне армиди. Тегунахъас мич цIегIуьфу
ис алттушуна ая. Ме исарин арайиъ Маджид дахьу ус баджат ая. Сирин военный операцигIра иштарак акьуне. ЯгIайин ягъара магьа Украинайиъ СВО хъучучIухабра Маджид мин иштаракчи э. Мисариъ ме учин ватанперасвел, гьунарлувел зурбадалди агвар акьуне. Ме кардин шигьидар э старший сержант Маджид Шабановас йидегьен джавизар.Мебурикес сад э медаль Суворова. «Гьелбетта, цIегIуьфу исан удигьай икьрар хъиртIан вегIдайи,зе фикирдиъра кехIей адавуйи мишттин дегIвибур хье вахттари хьасе пуна. ЯгIа, хьеал душман гъамаз хьу вахттуни, зун хIезур э ватан бадалди сув
суман гъузас, зе хъугъуб ая джалла аскерарин фикир гьеме э пуна, Фас пучин, гьер са идемин ке хIа вазифа учин хизан, хал, Ватан ухIуб э. Кьанайи, дахи зун пасттава, амма гъалибвел фай гьер са аскер учин хулахъди адисе», — пуне Маджида.
Гьеме чIаларилас къул диваф суман, хулаъ гъузуна ая Маджид Шабановичахъ учин зурба йиркIв ая хизанра, Iуд валадара.
Чес ягIа чугъсагъул пас кканди ая гьемишттин хIуьлдандин йиркIв ая игит ухIуна хIа акьу дадасна бабасра. Хье джаллабурин мурад, матлаб э гьер са дадан — бабан валад чиппин багуливди сагъ — саламатилди рукьуб.
Салихат Малагусейнова