2023 иса Дагъусттандин ДГПУ агъа университетин хьуная 80 ис. Ме иса Гамзатовский университетин гIелимарин икьрарилдира, хъара хье хIаттин Сергей Меликованра, хIуькуматин Минпросвещенин разивелра фай ме университетис йиная Дагъусттандин назумчи Расул Гамзатован ттур.
Ме университетиъ хурая студентар гьер джуре факультетариъ. Мисаъ ая 15 дегьен гьер пешайин факультетара. Мебурихъ хъая гьер са направленин кафедрабура.
ДГПУйихъ хъая учин тарихра, учин гIедатара.
ЯгIайин ягъас мисаъ хуру инсанарикес хьуная гIелимар, профессорар, министирар, хIа курарил кар аркьа хIекимар, идже дарсар ирцIан мегIелимар. Мебурин сандигI гIая хье агъулара. Хье ттур ая мегIелимаригIра гIая мисаъ хуруттар. Мебур э: Гасанова Пери Гасановна, Кубаева Айша Мазаевна, Габибулаева Зубайдат Ахмедовна, хъара джуьреттара. Ппара ме институт ккиркIу мегIелимар ягIара кар аркьая райондин махьтабариъ.
12-пе октябрьди ме кар бадалди университетин удигь хьуная лап хIа мегIрака. Мисаъ завал хьуне гьер районарин подворьебура. Агъул райондира чиппин подворье дуьхьуьна уйи. Мисаъ авуй хье ме университетиъ кар аркьая мегIелимар, мисан выпускникар, хурай ая студентар, джигьил шаирар, хъара хье райондиас аде ЦТКРдин пешакурара. Мебури мисаъ агвар акьуне хье авал заманайин гьер джурейин IуьтIубар.
«Агъулари хабарарин» редакцин пешакурари мубарак аркьая Дагъусттандин педуниверситетис 80 ис хьубан хIаягъ.

Батитай Габибулаева