Гьер иса сентябрьдин хьибудпе ягъа аркьай аве гьер джуьрайин мегIракабур. Мигелай гьемишттин мегIрака файшуне Ашурован ттуранихъ хъая макьамчибурин училищейиъ. МегIракайин ттур хьуне «Беслан: мы не в праве забыть» агъаф. Ме ягъа кIилин Российин халкьди кIвал аркьай аве Беслан шагьурдин махьтабиъ хьу зулумдин кар. 2004пе иса ме махьтабин хIаягъ са дакьикьайин арайиъ гуджлу дардунихъди гьуруцуне. 2005пе исалас мич ме ягъ «О днях воинской славы России» агъа федеральный къанунилди кIвал аркьа ягъ суман акьуне.

МегIрака дахъуна ке удигьай гъургъуне тербия ирцIан кардин рекъуьъ заместитель иде З.М. Гаджиева. Гъургъаттари нубати сайи ме зулуматин вакъиабур кIвал акьуне. Махьтабиъ ая шибери хуруне шиирар, акьуне «Аист на крыше» агъа мегIнира.

Хабди гъургъуне директор К.Г.Махмудова: «КIванна кIилиъра адавай ме зулум агуф ацIуна инсанарис ппара хIа гъам хьуне. ГьамебуригI гIая зе руш Тамарара. Хье хIуькуматин тарихдиъ ппара ая террористарин Iайвел киркьу ягъар. Чурхъас акьуне хулар, метробур, вокзалар, джемеIетин улакьар. Фарцанди инсанар есирвелди мебури дакьуттар хьундава. ДехIела ме ягъа кIвал аркьа джалла ме Iайвел киркьудегьенттар.

Студентарис пасе зун, чве дадар бабарис хIуьлмат акье, гебур ухI, петтарил йиркIв али, хье гIедатар ухI. Миштти хьучин чун сайивасра цIаку рекъуьъ ихьас хьасттава»

Ахирахъди кIидегьенттарихъас фикир ухIубан рекъуьъ джаллабур са дакьикьайи буIуне.
Салихат Малагусейнова