Дуньяйиъ ая итталар, фидегьен цIуппе имунитет хъайчира, кумак давереттар. Сад
мебурикес э гимикIер (корь). Ме иттал ппара Iайи дахи куькъа иттал э. Са итта инсандин
багулив гъузухаб, мункинвел ая вунра иттархьасе пуна. Амма ме иттал кидиркьвас са
кумак ая, ме э вакцинация акьуб.
ГимикIер хьубан багьана э вирус, къуркъариъна хъехъвериъ адаркаф итта инсандин. Ке
Iайи кедишафра гимикIер мухур акьугуна, гIемчи акьугуна э.
Фикир акьучин, уч иттал лидегьен Iаф дава, хабди вере четинвеларихъ хъуттурфуна. Фера
хьуна дакканчи, вахттуни вакцинация акьубалас идже кар адава ме итталис. БицIи
шиниккварис чиппин вахттуни аркьа — са ис хьугуна, хаб Iудпе прививка — ерхьи ис
хьугунара. Нагагь учин вахттуни акьас дахьучин, мугьлат хьу арайи акьас ве ге
вакцинация.
ГимикIерин инкубационный вахт э 10 ягъалас 14 ягъасттегьен. Иттаф ягIарве: ифулилди,
мухур акьубалди, хъехъвер фацубалди, къуркъари Iуьр акьубалди, улари Iуьр акьубалди,
суратил хьу джагвар тIамтIамарилди, джан агъахъубалдира.
Эгера садпе прививка вахттуни дакьучин, ахттигьар ая ерхьи ис хьастти акьас. Хабди
Iудпеф ерхьи ис хьухаб. Садпе прививкайинра Iудпеттин арайигIас гIайшуна кканде хьибу
ваз.
ХIа инсанарис, сагелайра иттар дахьуттарис, са нубати дала прививкара дакьунатарис,
гимикIерин прививка акьас ахттигьар ая 35 ис хьастти. Ая саса джуре инсанар, 55 ис
хьасттегьен прививка акьун кканеттар, мебур э: больницайиъ курар аркьаттар,ариш-
варишчибур, хъара сае идарабуриъ курар аркьаттара.
ТегIде хьуна аркьа прививка, яшанихъра хъуттудурфуна джаллабурис, эгера
иттархьуттихъай уйихаб. Ме джурейин вакцинация акьас ппара мугьлат ирцIандава. Эгера
гимикIер кея инсандин багулив хьухаб 72 сеIетин арайи, вархайилас кедишинаф идехаб
ери ягъан арайи акьасра кея.
ГимикIерин прививка акьас хьасе гьертивас уч дуламиш вея мукьуйиъ.
Сагъди илгурай чун!

Батитай Габибулаева