Гьетегуна садпе, хьибудпе Беларуссин дегIвин ишттаракчибури йирхIуна, пара хIа зарар йине шагьурдин багулив фая немцарин частарис. ХIа кумак акьуне Красный армис Беларуссин партизанари. Гебур ккеркьвай хьуная хаб йирхIуна вея немцарин солдатарис, чурхъас аркъай мугIар, рекъер, четин аркьай гебрис рекъ. 30-пе июньди хьеттари фацуне Слуцк агъа шагьур са верш километри рекъ ая мич Минскдиас. Гисаас ушуна фацуне мебури Березина агъа шагьур, хабди гъидирхIуна ушуне гебур Беларусин ке хIа шагьурдиди. Алукуб акьас фикир акьуне гебури гIуьшан хьибуйин сурас хьибудпе июльди. Хьибуд танкарин, сад мотострелковый бригадабур тIушуна кканди уй Минскдиди чипин мукьариас. Шагьурдиъ хьеттар ачахъугуна гисаъ дуламиш вея инсанар шадтти алчахъуная солдатарил.

Немцари гъайи зулумар акьас алучIай хьуная чаб гьишагуна. Гьемиштти гебури чурхъуная 23 кархана, агъатуная хьеттин хIебз, аккетуная 47 махьтаб, са хубджи больницабур. Зарар йиная рукьан рекъуьс, аккетуная ацIуна хулара. Гьегидегьен читинди айчира инсанарис, гебури чипифас агърукьа Iелеттин кумак аркьай хьуная ачади хье солдатарис.

Гьеме кардис бахш акьуна кьанди Москвайиъ агъатуне салютар, йирхIуне завариди яракьариас. Хьибудпе июльди Iеквeфай хьеттар ачахъуная гьер багварихъас Минск шагьурдиди. Мебур гич ачахъугуна, сасра арми рекъ кьатI акьуная кумакис вея немцарис, хаб вес аркьай гебур чаб ая магъриб багухъди. Беларуссин ке хIа шагьур аккетуна уй къацIра ягIар акьас даверегъилди. Гьемиштти хьучира дегIвин ишттаракчибури чипин акьуна ккане кар кIили файшуне.

Алена Магомедова