Агь замана замана, зулуматдин замана
ДегIви багьана хьуна Iуьмурар угу замана.
Дуньяйин варттал хIаягъар, бицIи ягъар гьер джурейинттар аве. Гьер са хIуькуматихъ, вилаятихъ, шагьурдихъ, хIурихъ, хизандихъ хъаве чиппис фиттилди хьунара багьа иде ягъар. Хье хIуькуматис мишттин ке багьа иде ягъарикес сад э ерчIудпе май – Гъалибвелдин Ягъ. Ме гъалибвел хье хIададари гъушуне Гитлеран кьушумарин хIуьджумдилди башламиш акьу Ватандин хIа дегIвиъ.
ЕрчIудпе май хье халкьарис ке хIа, ке багу, ке багьа, хъара ке пушмал хIаягъ э. Ме ягъ фикирлу ягъ э чиппин джигьил джанарна Iуьмурар пуч акьуна, хьес гъалибвелдин пайдагъ, ислехI зав, багьа азадвел багъиш акьу игитарихъас.
ЯгIайин ягъас мебурикес тек – туьк дала баджат дуньяйил аме. Чаб хьехъай андайчира, мебури хьин бадалди, хье Ватан бадалди диву загьматар арайил алме.
Те дженгерин унар сакин хьуна ппара гагь э. Амма хье келлабуриъ мебур гьалра аме. Хьин мебурин гьунарлувелдил, зурбавелдил дамакъ аркьай, йиркIвариъ ухIая мебурихъас фикир. Хьес зурба чишна э хье дегIвин иштаракчи несиларин йиркIварин зурбавел, кIиларин варттвел, руьхIдин гуджлувел, суратарин ламуслувел, гьер са четинвелдикк хIав ккехьуб, ватан кканхьубна ватандис вафалу хьубра. Фас э пучин? Гьеме тIабиIетарна хасиятар хье зурба халкьдихъ хъай уйихIела э мебуривас хье ватан душманариккес азад акьас аттрукьуф. Хье хIуькуматиъ ацIуна миллатар ая. Мебури джаллабури чIал сад акьуна хье Ватандин тарих ухIуне. ЯгIа хьин гьеме игитарин хабдин несилар э. ДехIела хье хIа вазифа э мебурин гьунарар, хье дадари–бабари хьехъди рукьас акьуф суман, хьин хье валадарихъди, хуттуларихъдира рукьас акьуб. Нагагь хьевас ме кар акьас аттрукьучин, хье тербия дуздинф хIисаб э.
Ме кар асуллу э гьер са хIурилас, хулалас, хизандилас, дегIвин исари агу азиятарилас, дардарилас. Ме исари дардарин хьед агьадату са халра илгундава. Ппара челишмиш хьуне инсанар дегIвиъ. Ппара пуч хьуне Iуьмурар инсанарин.
Къирагъ хьундава ме кардигьас хье Агъул районра. Агъзуралас вартт файшуне гьер хIурариас хье джигьилара. Гьава суварин кIиларил, баябан дагьарариъ аруцай хIа хьу хIуьлдандин йиркIвар ая асланари, са гучIра адавай, дженг дивуне душман Гитлеран кьушумарихъай. Мебурикес хIа паярис кьисмат хьуне гъурбатин кIаре джил. Сур ун, хьил андавай гулуттара хьуне.
Гьелбетта хьуне бицIи паянин пай дегьен Ватандин удигь чипин бурдж йина, хулариди адиттара. Мебур и Ватандин джиларик кьисматар киметтар. Джалла игитарин ттурар гъагьалцуне агъай хъучархьасттава.
Гьемиштти душмандихъай дженг дивуна Ватандихъди рукьу игитарикес сад хьуне Ватандин ХIа дегIвин иштаракчи Сагидов Хидирнаби Сагидович. Хидирнаби Сагидович са агъзурна ерчIу вершна къадпе иса Агъул райондин ЧIаарин хIуриъ Сагидоварин хизандиъ хуне. Ме хунухилас учин, игитвелилди чиппин ЧIаарин хIур, хал, хизан ухIай, Iуьмурдин рекъ файшу несиларин чишнайилди хIа хьу джигьил джаван и. Ватанил душман хIевалат хьуная пуна унихьуф, Хидирнаби учин ахттигьардилди уч весе пуна ушуне ватан ухIас дегIви хъучучIугъилди.
Ушу ягъалас адесттегьен Х. Сагидович ахьуне 144-пе стрелковый полкуниъ. Гьужумарикес са мил хьуне йирхIунар. Багулив чурхъу снарядин кьурцар киркьуне мин чахIппил багус, са улра адархьуне. Хубджи гагьари духттурханабуриъ хьуне, сагъ хьуна аттихаб, хаб давам акьуне учин дегIвин дженг, гъалибвелдихъди рукьасттегьен.
Хидирнаби Сагидовичан багу – кIиларин чIаларилди, ме есирвелдиъра архьуне. Хабди мебур са къа аскер духIуба акьуне немцарин са офицердихъай. Хъай уйи михъ джавизара. ДегIви ккиркIухаб, адине учин бицIи ватан иде ЧIаарин хIуриди.
КIине Сагидов Хидирнаби Сагидович са агъзурна ерчIу вершна муйцIурна Iудпе иса.
Ме ХIаягъ ис – исалас хьегьас варха ве. Фидегьен варха хьучира, хьин мусра хум гьатуна ккандава хье хIададарин гьунарар, мебури ме ягъахъас йи кьимат. Дунья ислехI хьурай! Валадар сагъ – саламат хьурай! Бабарин суратариъ элхъ хьурай! Сайисра дегIвибур дагурай!
Салихат Малагусейнова
