Бабахъас, бабан загьматихъас фидигьен кканчина гъургъас хьасе. Баб гьеме дуньяйи ке багьа, ке ширин инсан э гьер шиникквдис. Гьер са шиникквдин сифтта агъа чIалра баб э. ЙиркIураъра аяф гьемишан баб э. Гьер миллатин халкьари бабан кьадар кьимат фарцанди лап хIайи. Хъара хьес джаллабурис ягIа, мусульман халкьдин инсанари бабан кьадар (достоинство) джурегъелди хIайи фарцанде. Джаннат бабан лекун кIенакк ккея агъа чIалар хьес адинаф лап гьете дадарин вахттарилас мич, ягIайин ягъаракегьей фикирдира йиркIура ишламиш аркьа чIалар э.
Шамсият Рамазановна Арсугъарин дишагьли э. Гьеми час ахъакьуне учин бабахъас, бабан Iуьмурдихъас Сеферова Угълангерек Абдуллаевнайихъас.
Угълангерек Абдуллаевна хуфе Арсугъарин хIуриъ 3-пе марти 1940-пе иса касиб хизандигъ. Хизан мебурин ппара хIаф давуйи. Баб Фатимат, дадас агъайи Абдулла, са чи Зайнаб милас хIаф, хъара са чу Джамалуттдин милас Iу исанди бицIиф. Дад Угълангерекен дахи кIине, гьеме уч Iу исан шиниккв идегуна. Дад мебурин ариш вариш аркьаф хьуная. Сагелай учис ариш вариш аркьа шейэр гъас ушуф Iэрабайилди Iуьрдин вегIдайи четин рекъериас алархьуна гьава мукьуйилас кIине. Бабал алчархьуне хьибудара учин шиникквара, хъара учин шуван бабна агъдарукьа чу. Баб Угълангерекен джерехIвелар кея дишагьли хьуная. Кьушан дерейи ая багулифая хIурариас вей хьуная гьемилди инсанар чиппис рехIми акьас. Хьара кьвадилкьванар аркьа устта хьуная ме. Шиникквар вей хьуная джемеIетин урчарихъ, лекарал аликIас гьуркIу лекра хъудай. Са ягъа урчарихъ ушубан шиниккварис хIурин хIуьппехъан идеми архIуна са хIуппалан хьеяр йиная мебурис, аликIас хьейин гвегIенар акье пуна. Чара хIилайилди дуламишвелар аркьай ухIуная ми учин хьибу шиниккв. Джаллабур идже чIал ай гъургъайхьуная Угълангерекан бабахъас. Хурубар шиникквари ккиркIуне якьудпе классилди рукьасттегьен. Те вахттари бицIи хIурари аяфра якьудпе класс и.
Угълангерек хизандиъ и Iудпе шиниккв. Махьтабар ккиркIуф, бабас кумак аркьай хьуне дуламишвелар акьас.
Хабди Угълангерекен цIеерхьи ис хьегуна баба йина ме шувас. Сеферов Рамазан Сеферович агъаттис. Гьеме ушуна са хьибу вазалалас мин хизан файшуне армиди Чернобыль агъа шагьурди. Гьеме вахттунис шиникквар михъ хъадавуйи. Ми хъай уйи хьиджарбаб, уларис Iекв даргваф. Хизан Угълангерекен армиъ амилгуне хьибу истти. Хабди муя ваз сара ахъирхIуне мин службайихъ.
Хабди мебурин арайил хьуне хизан. Сифтта мебурихъ хьуне кIилди цIеIу шиниккв. Мебурикес амилгуне яри шиниккв.
Сифтта хиял Угълангерекен шиниккварихъас махьтабар ккиркIуфна сад хурубар йис. Фас пучин уч бицIигунан вахттари, хаб учин хIа хизан арайил акьас хубджи загьматар, четинвелар хьуне Угълангерекас.
ХIуькуматин курар мебурив фадавуйи. ХIапай дуламишвелар хьуне хIуппар ухIай. Учи даяркавелар аркьай хьуне варха сувариди вей. Хъара Угълангерекес уч бабахъас хьуна, гьемира джерехIвелар аркьайхьуне ппара хумбарис. Гьемишан фикир аркьай хьуная ми, хъара йиркIураасти кьасттра акьуне ми учин шиниккварис духттурвелдин хурубар йис пуна. Гьемишти махьтабар кIиркIуфна сад гьикуне ми учин шиникквар хура мукьариди. Учил алчархьу четинвелар загьматар учин шиниккварис дахьурай пуна.
ЯгIайин ягъас михъ хъая якьу кIиркIна хьибу руш. КIилди шиниккварис, хъара (гунари гIефа кьурай) кеттарисра йине хурубар Угълангерека. Са пай шиниккварив фая духттурвелдин хурубар, сурис мегIелимвелдин хурубар йине. Уч Угълангерек ягIайин ягъас дуламиш вея Дербент шагьурди. Уларис дуньяйин Iекв даргвайчира, амма йиркIуран цIуьппевел аме Углангерекан. Сагъвелар йирай кIилди гьеме дуньяйил аядегьен бабарис чиппин шиникквар арайил акьас.
Наибет Гасукаева
