Агьал дуньяйин варттал инсандис ая мункинвел гIаттивас ккане джурейин пешабур. Авалан вахттари ме кардихъас хIа гаф акьас верегъилди адавуйи. ХIа пай пешабур инсанари чиппи-чиппис ягIар акьуттар и. Миштти са пешабурикес, мус хьучира уйиттарикес, духттурвел э. Мус духттурдин пеша инсанарихъди адиф ичин, агьал ягIар акьас хьасттава. Фас пучин, гьемишан иттаттар сагъ аркьа джерехIер аверефи.
Авалан вахттари, алтухъ хурубар адавайчинра, инсанари джиркIенфи гьер са итталис дарман. Те вахттари джерехI инсанари кеттивайи IуькIерикес, тукарикес, кьаларикес дарманар. Сагъ аркьайи уьттулди, ччамулди, хIалатутилди, имбирилди. Амма ацIун итталар авейи, фиттилдира сагъ акьас давереттар.
Гьер са вахтт гIавей бадил вейи гьер джурейин кьацIра уларис дагуттар, ибурис ундихьу итталар. Ме холера, чума, гимикIер, ликьар агъай. АцIуна инсанар луькIейи гьеме итталарифас, руб-дарман джиркIегунас. Ппара луькIейи хъара бицIи шиникквар. Iуьшан багамис Iабаъ сагъди икIуная шиникквар кIина фачархьайи. Итталарин ттурар дагIай, гIевам инсанари фиттилас кIеф ичин дагIай, «фун гъутуне», «кIил гъутуне» агъайи.
Те вахттари иттаттихъди учIун вес алтухъ машинар адавай, Iуьш-ягъ, мекI-угъал дагъай, хьилаба вес алчархьайи. Муш кеяф духттурак и. Ая са духттурал ппара кар алвейи. Мин вазифа и хIаттара, бицIиттара, Iусеттара сагъ акьуб.
Вахттар ккеттвей, бицIи-бицIи инсанар гавурдиъ архьуне, хурубахъ хъучархьаф фера адаваф. Ппара дахьучинра, сад-Iуд хьунара авейи хIекьдан хуру духттурар. Ппара кар алвейи мебурил. Хабди, исар, вахттар ккеттвей, хьуне гьер джурейин духттурар. Терапевт, хирург, отоларинголог, кардиолог, окулист, педиатр, хъара сасрабура. Гьер духттуран вазифа хIайи э. Амма ягIа зас гъургъас кканди ая педиатрдихъас.
Къадпе ноябрь педиатр-духттурарин хIаягъ э. Джалла джагвар халатар хъая духттурарин кар — ппара хIа кар э, амма бицIиттарин духттурарин вазифа джурейи хIа э. Фас пучин, хье мисала аяфе: «БицIиф дахьуна — хIафра верефттава» пуна. Педиатрдин кар джурейи четин э. Iари духттур хьуне агъай вейдава. Иттаттар сагъ акьуб кидавай, мебурис ягIай кканде бицIиттарихъди хIел джикIенас, гучI дахьас. Сагелай гучI бицIиттис хьухаб, хабди джагвар халатар алеттар агудегьен Iешай эркьва шиникквар.
Хье райондиъра ая педиатрабур. Сад мебурикес Исакова Савадат Насрединовна. Джаллабурихъай, учин къатди ая шиниккварихъай, ушуне ме махьтабиди. Махьтабиъ ами димари мин ппара гIешкъ уйи духттурдин пешайиъ. Махьтаб ккиркIухаб, учlуне ме Дербентин медучилищейиди. Ме ус ккиркIуне ми ире диплом гъушуна. Хабди учIуне ме хъара хIа гIилми гушанас Махачкалайиъ ДМАйиди. Хабди хуруне Москвайиъ РМАПОйиъ. 2000-пе иса адине Исакова Савадат райондин больницайиди педиатрвелди кар акьас. ЯгIайин ягъасдегьен кар аркьай аме ми. Фи чве кардин ке четинф пуна суал йигуна, ми агъа: «Че кар четинф суман, ппара тамашинфра э. Гьергелай цIае инсанарихъай хьучархьа. Че кар чIал дагIа валадилас э башламиш аркьаф. ХIа инсанди ахъаркьа, найе ус иттайчин, учин джандин хIел фиштти айчин, фитти уч бизар аркьай айчин. ЧIал дагIа бицIиттарихъай кар четин э. Мебурин итта ус, Iуьр кея ус духттурди хъуттурфуна джикIина кканве. Хабди дуздин руб-дарман акьуна кканве сагъ акьас.
Дуньяйил валад яратмиш хьуфна сад, ке удигьай хъуланф педиатр э. Хулади больницайиас хъаттфайдифна сад, ке удигьай хулаъди верефра духттур э. Че вазифа, шиникквдин гьавайихъ хъуттурфуна, ягъниш кейчин, кидавайчин ягIар акьуб. Хъара ягIар аркьа джигьил бабарис шиникквдихъ фиштти хъуланф ичин, фи курар акьуна кканчин ме кьуват кей хIа хьас. Вахттуни раккагьди гъас, гъархьас акьас. Педиатр Iари духттур дава, ме Iудпе баб хIисаб э. Шиникквдин цIемуя ис хьасттегьен че гъилиъ ая шиникквдин сагъвел», — пуне Савадат Исаковайи.
Инсанди агъафе, больницайиъна милицайиъ адархьурай пуна. Амма агьал заманайиъ сагъ инсан андава, фи багьана хьунара алчархьа духттурарил. Чугъ-сагъул хьурай духттурарис, чиппил алчархьугуна кумак аркьаттарис, йиркIв фай хъуттурфуна, четин ягъа гъил йирхIаттарис. Инсанвелра кам дакьурай мебурихъас.
Луиза Гусукаева
