24-пе февральди 2022-пе иса башламиш акьуне военная спецоперация Украинайиъ. Сифтта Владимир Владимирович Путина обращение акьуне вилаятин джемеIетихъди. Ме арайи ми пуне фикьас аттивуф ичин мишттин маслихIет. Мин чIаларилди, хье хIуькумат ппара гагьди сабур аркьай гъузуне. Муя истти Украинайи ппара азмурар аттивуне ДНРдинра ЛНРдин халкьдикес. Ме муя истти ппара халкь пуч акьуне мебури яракьиас атай. Мебурис хIуькуматикес рукьая ваджиб, шиниккварин пулар, пенсибур даирцIанди гъурзар аркьайи.
Хаб башламиш акьуне, Iурдин вегIда, сае вегIда дагъай, Iеквар хъадихьас, хьеттарин фургIунар хъикIас. Са чIалалди, мебур ккедихьас хъучадаркуна уйи. Мидегьен гагьди хье хIуькумати ппара кумакар акуне ДНРдинра ЛНРдин халкьдис. Хье багухъас маркьа пу арайи, мертти хъуьластти хъара ппара зарар ирцIанди мисаъ яшамиш вея инсанарис. Мидегьен гагьди хье хIуькумати агъа гафарарис мебури ибур йиндавуйи. Чун ме инсанар сакинди адатухаб чин хъагъишасе пуна, хабар йина уйи мебурис хье хIатти. Айчира мебурин хиял хьуне, мебур гьакIан гучIар алихьас агъая чIалар э пуна.
Спецоперация башламиш акьу вахттуни, хье хIуькумати шагьурарикк, хIурарик кетай давуйи, инсанарис зарар дахьурай пуна. Ама ВСУйи джала яракьариас атайи газарин турбабурис, Iекварин подстанцибурис, заводарис, садикарисна махьтабарис, больницабурис. МегIракабуриъ акьу маслихIетар кьабахъ ягъа димари ккедихьайи, хаб атай Донбассдис.
Ахирахъди, сабурарихъ мебур хъучадевеф агуф, В.В. Путина, халкьдин разивелра фай, Iуьрусар дуламиш вере ДНРдиъ, ЛНРдиъ, Запорожскийна и Херсонский областариъ файшуне референдумар. Гебур гIачучIуне РоссийгIди. Гьал Российихъ хьуне 89 субъект. Миштти хьуф мертти гиран хьуне Украинайин хIаттарис, Европайина Америкайи гъурур суман Российил алчикаттарис. Сасра хIуькуматариасра файдина кумак, мебури башламиш акьуне дегIви. Мишттин кар хьуф, 21-пе сентябрьди 2022-пе исан хье Президент Владимир Владимирович Путина адихьуне «О частичной мобилизаци» агъа Указ. Хье хIуькуматин Министр обороны Сергей Шойгуйи пуне завал акьуна кканде пуна 3 верш агъзур военный билетар фая инсанар. Амма джалла билетар фаяттар гIачархьундава мич унархъаттаригI. Мебури пуне герек иде пеша, яш, звание гIачархьаттарин. Хабди гьер регионарин военный комиссариатариас гьикуне мобилизацин кIеджар мебури агъа чIаларихъди хъудуьхуьттарис. Ппараттари, кьацIра чиппис кIеджар дайичира, чиппин кIилилди рази хьуна гIайчIуне вес.
Хье райондиасра завал акьуне инсанар. ЯгIайин ягъас файшуне ерхьи инсан. Сад мебурикес Типпигъарин хIуриас Магомедов Саид-Хусейн Магомедович. Ме гIачархьуф садпе джалгайигI Iу истти Хабаровский крайдиъ танковый войскабуриъ аскервел акьухIела. Мисаъ ая гагьди хулади адифе михъас баркаллагьдин кIеджар дадар-бабарис. Мишттин зурба шиниккв вардиш акьуна хIа акьуттарис.
ЯгIа бабан фикирар фи э пуна хабар гъушугуна, Наидайи джуваб йине: «Гьелбетта, гьер са даданра-бабан хIа матлаб э, чиппин валадар са хатIа, тахсир киркьвас адатуна ухIуна хIа акьуб. Гьер са хизандис багьа э учин шиниккв, сайисра ккандава мебурин тIубуъ Iуьр ирхIунара. Хьин миштти пучира, ппара курар ая хьеалас асулу даваттара. ЯгIа, хье хIуькуматис кумак герек иде вахттуни, завас хьундава къирагъихъ экьвас. Зе кIиркIас ушуна кканде пе вахттуни, зе йиркIурас фидегьен къикъи ичира, завас хьундава мин удигь багв йирхас. Зун пучира, зе чIаларихъ Саид-Хусейн хъучавесра давуйи. Зеф суман, ягIа джемеIетин шиникквара ушуная кумакис. Идемарин вазифа э учин хал, хизан, ватан ухIуб. Агьал гьертти учинф цIуьппе акьучин, багайин ягъа гьерттин са хулади адисе бала. Джаллабури чIал сад акьуна, са маслихIетилди адичин, хьасе хьин арайилра. ЯгIа шиникквар гьикуная бабар дакканди, ппара хьуна рази хьуттар дава. Джандин са пай фатIуна файшуттар э мебур. Амма, фикирдилди гъавурди ая чара адава курара идеф. Ппара идже хьаси хьин ягIа ме ягъалди дайдина уйчин. Джаллабур ушуная идемар сагъ-саламатилди рукьурай чиппин хулариди, хизанарихъди, бабар-дадарихъди, валадарихъди. Гьер са бабан йиркIуракес ухIурай, бала-къадар вархал акьурай», — пуне Наида Магомедовайи.
Луиза Гусукаева
