Малина э ацIуна исарин кьвали. Гьер мукьарин гьер джурейин ттурар ая малинайин инсанари агъаттар: мамура, багнишин некьи, косматка.
Малинайи мухурин иттталар хьас адарта микьдарар ягIа джала инсанарис. Ге некьикна гин цIабарик кея ацIуна инсандин джандин сагъвелдис кумак ирцIан задар. Духттурарира ппара далилар гъа гик хайирдин задар кейя пуна.
Малина уза ацIуна хIуькуматари. Россия садпе хIуькумат э ге некьи узубаас. Польша Iудпе хIуькумат э. АцIуна сортар айя малинайин. ГIелимари аттивуна ая гьер джуре рангарин сортар — мучIе чулеф, иреф, кIареф, Iекве чулеф, хъара къизилдин рангунин. ГIелимарис гьалдис ягIа цIегIуьфу джурейин малинабур, узунаттар гьер джуре хIуькуматариъ.
Авала хье Агъуларис ягIафдавуйи ге некьи. Агьал хабар гъушучин, са кьадаринф дехIера бусттан хъадаваф нагагьра адава хIуриъ. Джала инсанари, узас мукь хъаттари, уза ацIуна джурейин малинабур.
Малинайик ппара кея аскорбиновая кислота. Верш грамм некьибуригI гIайя 37% ягъанра Iуьшан кьадар хIа инсандин. ДехIела ге некьибур IуьтIуна кканде микIилавас гъайша итталар хьугуна.
Салициловая кислотайи чIукь аркьа инсандин итталин гьавара, хъара чIукь аркьа итталин Iуьрра.
Мебур кидавай, малинайигI гIайя хъара антоцианар. Гебури э гьер джурейин ранг аркьаф малинайин. Ранг кидавай, антоцианари генный структура чIирхьас артайдава инсандин, клеткайин мембранара цIуппе аркьа, жирарна углеводар уьцIас аркьа, кишечникдин гIанаъ аяттар.
Хъара антоцианарари вартт гъайшас артайдава саса бактерибурна грибокар хье джандиъ аяттар, вагинальный инфекцибур аркьаттар.
МалинайигI хъара гIайя Iу джурейин флавоноидар — катехинарна эпикатехинар. Гебури иъин табарин багвар цIуппе аркьа. Флавоноидар герекде иджи кар акьас кIилин маскъу.
Iари малина дава идже идеф инсанарис, гин цIабара Iайи дарман кеяттар э. Малинайин цIабар ишламиш аркьа микIилан иттал агуна, мухур хъагуна, кьуркьари Iуьр аркьагуна, джандин кучвел гъайшигуна.
ЦIабар малинайин ацIуна гагьди атуна ккандава, гебур чIирве. ЧIирдахьас гебур рукъас аркьа 100 градус температура ая пичариъ са сеIети. Хабди арта са ягъди рагъугьра.
Малинайин цIабарин хьед ишламиш аркьа: кардеологиъ, акушерствойиъ, гинекологиъ, проктологиъ, дермотологиъ.
Ппара курарис идже муфиIет кея малинайикес: йиркIурасна табарис, чIирхIе иттал дахьас, уларин Iекв цIуппе акьас, фагьум цIуппе акьас, ирккари табари Iуьр дакьас, хъара джуре курарисра.
Хъуьхъе малинайик лидегьен муфиIет кеяфдава ирефдегьен. Ире малинайик ппара витаминар кейя. Ама кIаре малинайихъ гебур Iудара хъучархьайдава. Ге сорт малинайин ке удигьай узунаяф э Америкайиъ. Ге кlаре малина фачархьайдава нандиъ кканчира.
Малинайикес иджвел суман Iайвелра айя. Ги мункин э аллергия акьуб. Шиникквдик кейя хумбетти ппара IуьтIуна ккандава малина, шиникквдин 36 хIефтта хьухаб. Шиникквдис некк ирцIанде бабара IуьтIуна ккандава малина, фас пучина, мункине аллергия хьас акьуб шиникквдис. Са ис дахьуная шиникквдисра йин ккандава гебур. Аллергия ая инсанари аспириндихъди IуьтIуна ккандава малина. Хъара иъ уькъе аркьа препаратар Iелдея инсанарира IуьтIуна ккандава малина, фас пучина, малинайи аркьа хабкIилан эффект.
Малинайин сок ухас ахттигьар адава гастрит айя инсанарис, желудокдин, 12-перстный рудун язва аттарис. Гебури ухуна кканде малинайин цIабарин хьед.
Малина IуьтIуна ккандава мавун чаркквариъ гъван аттари, фас пучина, малинайигI гIайя щавелевая кислота, ги аркьа мавун чаркквариъ гъванар. Малинайин цIабар гIая дарманар IуьтIанас ахттигьар адава гьеме итталар кейя инсанарис:
1.Хронический запор.
2. Подагра.
3. Бронхиальная астма.
4. Нефрит.
5.Полипар хъехъуьраъ.
6. Аллергия.
Нафият Шамсудинова
