Вахтт… Ппара хIа мегIна хъая ме гафунихъ. Лап тамашин зад э ме. Ме гьишина алттве, ккиркIуна кIвалас гьарта, йиркIвар сакин аркьа, инсанар сад сайигьас гьучихьай гьадихьа, амма сагелайра гъалатI бадалдира гъурзандава. ДехIела гьер са инсанди уч яшамиш вере заманайис, вахттунис, гьертти учин Iуьмурдис кьимат йина кканде.
Дуньяйил инсан яратмиш хьухаб, Iайи духIуба хьуная заманабур, гьер вегIдабурин курар – лихунар. Фикир акьугуна, алгъавей, алавере тукар хIисаб э инсанар. Амма ке Iайи духIуба хьунаф джемеIетин Iуьмурдин шартIарна курарис ишламиш аркьа деликар э. Ягъ ягъалас алттвередегьен фичира са итIул кIвал акьуна, са герек иде делик арайил аркьа инсанди.
Ппара духIуба хьуная рекъер, улакьар, яракьар, деликар. Мебурис ул йирхIугуна, хиял ве яраб фи зурба йиркIв, Iекьуллу келла хъая инсанари кIвал акьуттар э гьан пуна. Iуьмурдин шартIар илгун акьас мебури фи кканчира кIвал аркьа.
Гьемишттин задарикес сад э хуппурар, багв-къирагъар уца чIиникI. ЧIиникI уч лап авалдинхаб ишламиш аркьая делик э инсанари. Авалдин вахттарин джалла деликарин ериндил цIае джурейин рехIеттин деликар хьуна айчира, чIиникIин ериндил фера мехIелдис адина адава. Гьалра дишагьлин гъилар дуга кьецI фи э пуна суал йичин, ме суалин джуваб чIиникI э. Фас пучин, хумбари алтухъ дирец гъили гъуланфттавуйи. Хуппурариъ узу кьурар милди уцафи, IуькIер акьас вейчин ме фавереф и, цулихъди къачарис вейчинра чIиникI дишагьлин хIа илдеш и. ЯгIайин ягъасра кехIей хуппурар кьурар узуб гъузуна айчира, ишламиш аркьай аме ме, багв-къирагъ, чIире бусттан, зад уцай.
ДехIела идеф хьасе ме чIиникIихъас ацIуна хIикатар суман ахттилатара аяф.
Хьуне агъа, хьундава агъа авалдин давурари са хIуриъ джадун устта. Хъамилгу рукьарикес ме усттайи са ягъа акьуная учис Iу чIиникI. ГIулин лихунар хъучучIу вегIдайи, са гIеджиз нежберди училди нан пуная усттайис са чIиникI. Усттайира батIарди хIуьттера акьуна йиная милди. Сасра чIиникI гIулди кар аркьафра дахьуна, илгуная усттайин салаъ.
Учин курар ккиркIухаб, нежберди файдина, чугъсагъулара пуна, фачийине усттайилди. Ачафайшуна сасра чIиникIихъай мера хаб атуне эесси учин салаъ. Ишламиш ппара акьувелди ме чIиникI, аттархьуна рекIвра кардиъ архьуна, батIара кехIей хьуна уйи.
Багулив фая чIиникIи, муьхIтал хьуна, хабар гъуланде кар акьу чIиникIифас:
— Фиштти э вун, кIилин гIулди рагъарикк лиханасра лихуна, лидегьен батIар хьуф? Ме зун гIулди найичра аттушунра дава, ахъухьуна экьуне гьеме салаъ. Амма, мехъвра йирхIуна, зун ппара чIирхIи ая.
— РекIв аттархьуна батIар вереф вун суман салаъ ахъухьуна экьугуна дава, зун суман гIулди лихугуна э, — джуваб акьуне мис джуре чIиникIи.
Миштти идегуна, кар ппара акьуна кIиттар садра адава, амма хье вахттари алтухъ лиханттара андава.
Салихат Малагусейнова
