Инсан дуньяйил яратмиш хье вахттунилас фикир аркьа дадар-бабари, яраб фи пешайин эеси хьас аркьагьан пуна валад. Дадар-бабари сагъилди фикирар аркьа, мурад аве йиркIураъ, амма кьисмати учин кар аркьа. Са ппараттаривас ве арайил акьас йиркIураъ ая мурадар, хиялар, са ппараттаривас, фидегьен алучIучира, сагъилдира арайил акьас давей гъата. Фиштти хьучира, гьер инсанди учис Iуьмурдин рекъ аттива. Гьерттис учин ризкь рукьа. Фишттин пешайин эеси хьучира, гьер инсан учи аркьа кардис, вахттар ккеттвей, хъудуьрхьенде. Агьал хъара аттрукьа инсанари Iу-хьибу курарин, пешабурин эвел аркьа.Ме кардис рехIет э хIурариъ яшамиш вея инсанарис. Мебури, чиппин хIуькуматин кар кидавай, хъара мал-къара ухIай дуламишвел аркьа.
Ягlа зас ахъакьас кканде са мишттин инсандихъас — Гусукаева Эльмира Рамазановнайихъас. Ме хуне Рамазананра Сафарин хизандиъ. Эльмира кидавай, мебурин хизандиъ хъара ая са кIиркIна Iу руш. Эльмира хулаъ ая валадарикес ке хIаф хьуна, хIа джувабдар мил алди уйи. 1994 иса ккиркIуне ми махьтаб. Махьтабар ккиркIу иса димари ушуне ме шувасра.
Хъая михъ са кIиркIна са руш. Шиникквара хьуна, хизанра хIа хьеф, агуне мис гъилив хурубан кедж фудавай читин идеф кIил ухIас. Сара алтухъ фикирар дакьуна, учIуне ме хурас Дербентиъ Институт Мировой Экономики. Iу исалас кардилра кьабул акьуне Миссиарин махьтабиди бицIи классарин мегIелимвелди.
Хабди йине милди обществознанин сеIетар. ЯгIара ме сеIетар фаме мив. Махьтабиъ ая шиниккварис гуни аркьафра Эльмира Рамазановнайи э. ХIуькуматин кар кидавай, ми ккийиная учис мал-къарара. БицIи ами шиникквара алихьуне кардил. ГIешкъунилди хъуланди, шиниккварикесра кумак хьуне мис. Сифтта ми учин хулас пуна ухIай уйи малар, хабди кея муфиIет агуна, алтухъ акьуне лудж. ХIуриъ ая аккуьшуна ая колхоздин фермара ккегъдивуна, башламиш акьуне мал-къара ухIас. Нис, чIам, ифал, некк, мутал, джар аркьа ми.
Гьер ме сурсатихъ ахъутIуна аве инсанара. Нубат хъихьуна аве гъулан инсанарин. Мишттин сурсатар агьал масса ирцIанттар ппара ая, амма сагелай Эльмира Рамазановнайин сурсатин тIем акьуттарис сара сасрабуринттар кканвейдава. Мертти, итти, йиркIв фай тIурша ме учин аркьа кардихъди. Малди кIил йис мебурихъ ппара ахъаджихIанара кканде. Вахттуни, иса Iугелай рубар йирхIуна, иъер гъушуна алгъузуна кканде иттар дахьас. Сагелай луджугI гIая са мал иттархьучин, микес кедиша аметтарисра. Ахьал са малдин кьимат чIукь дава. Хулан са багв фатIуф суман ве хуни кIи вахттуни, ппара хIа зарар э.
«Малар ухIас рехIетин кар дава. ГIешкъра ай кканде малди кIил йис. Кумакра идже кар э ппара ухIахаб. Азият ппара ичира, миштти хайира кея мебурикес. Агьал дуньяйин гьава читин хьуная, фера миндавай багьа хьуна вахттуни Iари хIуькуматин ваджибдиъ ачадаркуна экьуне агъай дуз вейдава. Шиникквара арайил акьуна ккане вахттуни малдикес ппара кумак ве.Чахъ, зун зас кIвалди амегунан хаб, малар хъаяфе. Агьал завас мебур духIай экьвас хьасттава. Шагьурдиъ яшамиш вей, рехIетти экьвасра мункинвел ая, амма зас ккандава. Амма шиниккварихъас гъургъучин, зас ккандава мебур экьуна маларигI Iуьмур фатуна. Са багухъас рехIетвелдихъас, сасра багухъас агьал джигьиларис читин хьуна ая хIурариъ экьвас. Зас мебур кканде, ушуна нандиъ хьунара, чиппин хал-мукь хьуна шагьурариъ экьуна. Фикир акьучин, рехIетар нандиъра адава, далихуна фера адава, айчира зас зе шиникквар ади багвариъ дуламиш хьуна кканде», — агъа Эльмира Рамазановнайи.
Луиза Гусукаева
