Ке цIайи ме организация дахъуф 19-пе майди 1922-пе исан. МисагIди кьабул аркьайи шиникквар 9 исалас 14 исан яшар хьеттар. Мебурин вазифа и кумак акьуб етумарис, Iусеттарис, дегIвин вахттари мебури къаравулвел аркьайи больницабуриъ, дегIвиди ушуттарин хизанарис кумакар аркьайи, куьчабурин мерттвелихъ хъуланди, гьер джурейин мегIракабуригI ишттараквел аркьайи. Мебур гIудавай са маджлисра вейдавуйи. Ме пионерарин организацигI гIая шиниккварин джуревел и сасра шиниккварилас, кьакьаас адайхьуна ае ире рангунин галстукилди, мебурихъ хъуйи чиппин пайдагъ, значок, мегIнибур, гIедатар, хъара «Будь готов!» агъа девизра.
Ке цIайи хье райондиъ пионерарин организация башламиш акьас хъучучIухаб, садпе пионерка хьуне Рамазанова Мукулсун Гаджирамазановна. Мукулсун и ХIеджирамазананра Фатиматан валад. Ме хуф и майдин вазала 1919-пе иса хье Агъул райондиъ. Мукулсунахъ са чира хъахьуне. Читинди дуламиш хьуне мебур. Мебур бицIи ами кIине мебурин дад. Баб хаб шувас ушуна, мебур илгуне ададарихъай. Мукулсун ухIуне Багьаларин Кьуби, ппай Фатимат ухIуне БехIерзарин Iебдулхаликьа. Дад-баб адавай, сасрабурин гъилариъ архьуне ме чияр. ЙиркIурас кканегъилди дуламиш хьуна адава мебур. Дадар-бабарихъай суман сасрабурихъай дуламиш верефттава, ичира чара хьуна адава ме бицIи шиберис, читин хьуне мебурин Iуьмурар.
Фидегьен читинди ичира, махьтабиъра иджи хурай хьуне Мукулсуна. Махьтабра хурун ккиркIухаб, хурас ушуне педучилищейиди. Газит хурас ягIаф ме дала адавахIела, сана пуна кьабул акьуне ме училищейидира. Гевус ккиркIуна адехаб, са фулан вахттуни кар аркьай хьуне ми женотделдин хIавелди. Хабди садикдин хIаф хьуне микес, михъай мисаъ воспитательвелди кар аркьай хьуне БегIедарин Асийира.
Шувас ушуне Мукулсун ГIатIарин Мазин кIиркIас ХIусейнис. Мебурихъ хьуне са руш Мухлисат. ДегIви хъучучIухаб, мин хизан ушуне дегIвиди, тидас хаб рукьундава. Хабди шувас вес кьисмат хьуне мис Гехъуьнарин ЭхIмад агъа джигьил идемис. Мебурихъ хьуне 3 шиниккв: Магьият, Джамалутин, Мафинат. Ме шуй ЭхIмадра ушуне мин дегIвиди. Мин хизан дегIвиъ аяхIела, мебурисра ирцIанди ахьуне хIуькумати паёкар, гашила дакIес эеси кIилил алдава вахттуни. ДегIвиас адехаб, те заманайи алтухъ машинар адава вахттуни, ЭхIмадакес хьуне машинар батIар устта. МегIелимвелра аркьай хьуне ми хье махьтабиъ НВП агъа дарсар ирцIанди. Гьемиштти дуламишди ахьуне мебур.
«Мус хьучира ахъаркьафи час учин хизандихъас, ппара зурба и агъай. Фи кар хьучира ккулинвел хъудавай акьас алучIа идеми и. АцIун час хизанарис савкьатара фай адефе дегIвиас верегуна, агъай ахъаркьафи час Мукулсуна», — пуне Сагибат Максудовнайи, Мукулсунан суса.
ДегIвиасра адина, вахттар алтушухаб, вахтт алдай нехIс хьуна кIине Мукулсунан ме хизанра. Гъудгъуларин мугIуйилас алттверегуна машинра фай, гьучархьуне ЭхIмадас IуькIер гъая Iераба, Iерабайис рекъ йис пуна алучIувусаъ, афархьуна фурар, алархьуна мугIуйилас кIине ме.
Ме шуйра кIихаб, читин хьуне мис хъара, гъилив фай 4 шиникквра. Ичира, учивас агърукьагъилди шиникквара сакин акьуне ми, хизанар акьуна. ЯгIайин ягъас михъ хъая 19 хуттулра, хуттуларис хеттара хъая.
Са Iу исарин удигьай, уч дуньяйил ами, хье хIуькуматин хIатти Владимир Путина агъламиш акьуна, ветерандин ашкIин э пуна, пул йине мис. Ге кар бадала хIуькуматин багухъас хIуьлматикк кичархьай ахьуне ме хизанар, мебур суман хъара сасрабура.
Хубджи исари курар аркьай хьуне Мукулсуна сестра-хозяйкавелди хье больницайиъра. Больницайиас айчIухабра, кьандисттегьен дири, учивас агърукьа курар аркьай ахьуне ме.
«Зе йиркIурак киме, Мукулсуна ахъаркьай, бицIи вахттуни читинвелар алчархьичира, алтухъ гашар, мекIер агу дишагьли давуйи агъафи уч. Кар фудавай, манат адавай хьефтавуйи агъафи учин», — йиркIурал акьуне Максудовнайи.
Хуттуларин фикирдиъра аме, ппара нешетIин идже хIабаб э агъай Мукулсун. Фи акьучира, е учисра, е учикесра гиран хьас акьу хIабаб дава хуттуларис. ЯгIара джаллайинра йиркIураъ Мукулсун-хIабаб.
95-пе исаъ ай, февральдин вазала 2014-пе иса кIине Мукулсун-хIабаб, садпе хье райондин пионерка.
Батитай Габибулаева
