Бинайин вахтт ме экзаменарин э 19 майди. Хье республикайиъ ме иса ОГЭ ирцIанттарин сан э 36 375 шиниккв.

Ме иса садпе экзамен э сасра хIуькуматарин чIаланф. Ке герек экзамен – математика- хьасе 23-24-пе майди. Хъара ке ппара гIаттива экзамен э обществознание, ме экзамен алийина ая 27-28-пе майди. Iудпе герек дарсунин экзамен э Iуьрус чIаланф, ме хьасе 7-8-пе июньди. Хъара 15-пе июньдис алийина ая ОГЭ дарсариас: биология, информатика, география, химия. 22-пе июньди хьасе ОГЭ литература, физика, информатика, географинра дарсариас. Хабди 4-пе июльдихъас 9-пе июльдисттегьен мугьлат ирцIанде джалла ес дахье дарсарин экзаменар йис.

Джалла усариъ экзаменариди аде шиникквар пунктуниди ачарта сеIет ерчIуйи. Мич ачаверегуна, мебурив фай кканде паспорт, хъара экзамен ирцIанттарин сандигIра гIай кканде. Джалла ачадина экьухаб, ОГЭ хъучучIа сеIет йицIуйи.

Нагагь экзамендиди адис кьана хьучин, ачартай э шиниккв, амма хIел аркьа вахтт ирхе вейдава, гьеге уч ачаде вахттунилас тич дала ирцIандава.

Ахттигьар адава экзамендиди ачагъас телефонар, калькуляторар, китабар, ишкилар ата аппаратар. Хъара, ахттигьар адава экзамендиас аттгъас хIел аркьа кIеджар, уч КИМра, мебурин ишкилар йирхIасра кидава.

Экзамендиди аде шиникквдис фачархье усаъ, учис ккане усаъ экьавасра ахттигьар адава, мукьар духIубабур акьасра. Гьерттихъ учин эркьва мукь хъая.

Экзамендиъ ая шиниккварис сад сайихъай гъургъасра кидава, кканегуна гъайшай адаркасра, организатордин ахттигьар фудавай аудиториас аттвесра. Аттвес кканхье арайира учив хIел аркьай фая кIеджара устулил атундала вес кидава. КIаре чернила ая кьаламилдидала ликIенасра кидава учис йина кIеджарик.

Эгера ме алийина ая мизанингъилди дакьучина, адикасра э экзамендиас.

Батитай Габибулаева