Мус хьичира ае ахттилат э Iелегунара, кар аркьагунара кумакихъ хъучархьаф фера адава. Миштти нуьхIуьбат, хIуьлмат уйи авалан заманайи. Зибзар суман джалла къуншибури мил акьуна, кумакилди ачархъайи IуькIер, кIурар, хулар аркьаттарис мил акьуна хандагар рукIас кумак аркьайи, нецIугIас гъванар гIаттивас вейи, усттайин пеша кея идемари цалар аркьайи, пешабур кидаттар хъулирханди, луз аркьай, гъванар хъучархъай. Идемарин пешабур мебур ичин, хумбари мил акьуна хуппурар уцайи, кьур алайхIайи, кьвадилкьванар рухайи, хъара сае джурейин курара аркьайи.

 Ме джалла аркьа курарикес, зе фикирди, йиркIв алттвере кар и кьвадилкьванар рухуб. Джалла кIилиъ ая хиялар йиркIуралас ве, Iари фикирар аркьа вун аркьая чишнайихъас: хьиму радж амичин, хьиму Iуьб алчихьуна кканди айчин, найисаъ нае рангунин ттун ишламиш аркьайчин накьишис дуьрхьегъилди. РехIетин кар мера дава. Кьвадилкьван гъили рукьастти, хубджи вахтт вейи михъди хIезурвей. Ппара гъилилас вейи хьеяр, ттун акьуна арайил верегунас. Сагелай Iуьрччанди, рукъас аркьайи, рукъухаб тIубу аркьайи, гебур рукIайи гъилин рагIулди. Хабди тIубучIилди аркьайи ттунар.Ттунарикес акьуна рачалар, агIартай рангара руьхьейи. Герек идедегьен рангарин ттунар арайил хьегуна, башламиш аркьайи кьвадилкьван ришас.

Авалан заманайи кьвадилкьванар ппара хъаф девлетлу суман аргвайи. Гьер са хулаъ авейи риши кьвадилкван, бехIсунис рухайи. Ахтармиш аркьайи, чун хьиму фур кейхьуная агъай, хьиму къари алеф э аркьаф. Сад сайин чишнайихъ хъуланди, кьабул хьехаб хъагъуландира и. Аркьайи хьибу фур ае кьвадилкьванара, 12 фур аеттара. Вахтт алттвередегьен дишагьлибурис кьвадилкьвандин цIае накьишар, цIае джурабур ягIарвейи.

Бабари чиппин усттавел шиберисра ирцIанди. Шибер бицIи ами ме пешайик кихьайи. Кьвадилкьван рухубахъ хъуттурфуна ягIар аркьайи авалдин вахттари хIа инсанари шувас вере рушан хъучуркьувел.

Кьвадилкьван ккея хулади верефи багу-кIилинттар, чиппин гъилихъ хъае ширинар, къайфатар, ямагар фай. Аркьафи зарафатар, мегIнибур, ахъаркьафи тамашин ахттилатар.

Ппара ишламиш аркьайи инсанари кьвадилкьванар: аккихьайи джиларикк, кейхьайи цаларикесра хулан ибгIавел ухIас, батIарди агвас.

Хъара бицIи кьвадилкьванар суманттарикес дуьркьанди шишалар, чантабур, хварджинар. Шишаларна чантабур ишламиш аркьайи хулан герек иде шейэр икIас, къаб-ттур, кунар, хварджинар чиппин гъушу те-ме, Iелеф

икIуна, хIейвандил алийина рекъуьъ гъас.

БатIар кьвадилкьван ппара хIа савкьат хIисаб аркьайи, шувас вере шиберихъ ахъатас.

Гьер са аркьа кардикк хIав ккейра кканде.Гьалдин вахттуни кьвадилкьван акьас ккане инсанар са-садар дала андава. Алтухъ ахъартайра андава. Амма шагьурариъ кунар масса ирцIан дуканар, кафебур ая джурейи авал заманайин шейэрилди дуьхуьттар, аккихьуна бицIи джурейин

кьвадилкьванра.

Зе фикирдалди, гъилин кьвадилкьванарис гьалра кьимат аме, ичира гьалдин инсанарис кканве гъушуна халичабур аккихьас. Фас пучин, мебурихъ ппара ахъажихIуна кканве, ттуттанас къикъи э, Iуьччучин рангар алчушуна чIир ве. Амма, фи пучира, гъилин кьвадилкьвандихъ хъучархьаф фера