ХъучучIуная гьиджрайин 9-пе ваз. Ме вазала фарз але мусульманари завкуран хаб мучI фачадаркасттегьен фера деIелди, духай эркьва чиппин джан ухIай гунагьин кураригьас, Аллагьдис гIибадатра акьас ппара алучIай.
Сив ухIуб фарз э бегьем хьуна ая, кумеф дава мусульманиндис, сив ухIас агьрукьаттис, цIе ваз агухаб, е удигьай уйи ШагIбан вазалан хьибцIур ягъ хIисаб акьухаб.
Сив ухIуб-якьудпе фарз э исламдин. Итта, агъдарукьа инсан идехаб, гифас ве сив духIунара экьвас, сив ухIучин хIисабра аркьа. Иттати, е джандин гIеджизди аятти сив духIухаб, ге гIату сив ухIуна кканве ги сагъ хьугуна, е кьуват хьугуна. Нагагь сагъ давере иттал идехаб, джандин гIеджизвел Iусевелдинф идехаб, гьер са гIату сивихъас са мискиндис Iелеф йина кканве. Нагагь гIату сиварихъас мискинас Iелефра йина, са вахттунилас сагъ хьучин, ге сивар хаб ухIайдава. Сив ухIатти ният акьуна кканве багамин къулгунин вахтт хьастти, зун сив ухIасе пуна. Инсанди кьастт акьуна аяхаб, джалла Рамазандин вазди сив ухIасе пуна, гивас ният акьас ве Рамазандин вазалан садпе сив фацанастти. Нагагь багьана хьуна сивар гIайшухаб, хаб цIе ният акьуна кканве. Суннат сив ухIубалас фарз сив ухIубан джуревел э, суннат сив ухIас ният акьас ве сив ухIа ягъара. Сафардиъ ая инсандисра фарз дава Рамазандин вазала сив ухIуб 80 км вартт ушухаб, амма ухIухаб керкьа. Рамазандин ваз ккиркIухаб учин гIатудегьен сивар ухIуна кканве джуре вазари. Хумбарира чиппин ягъар аягуна, е шиниккв хуна сагъ дахьуна аяхаб, сивар ухIуна кканвейдава, амма гIайшудегьен сивар Рамазандин ваз ккиркIухаб джуре вазари ухIуна кканве. Фуниъ ая хумбарисра, шиникквдис некк ирцIанттари, нагагь четинвелар аяхаб, сив духIуна экьвас ве, амма джуре вахттуни ухIуна кканве. Нагагь гуни IуьтIуб, хьед ухуб, алагъатуб акьуттари кьасусттира, гебури акьуне хIа гунагь. Са паяри агъа, кьасусттира сив духIуттивас Рамазандин вазала, кIилин Iуьмурди сивар ухIучира гин аджру гъушанас хьасттава пуна, амма джуре вахттуни ге гIату сив ухIуна кканве. Сив ухIуна ккане вахттуни фи ичира IуьтIухаб е ухухаб сив кевейдава. Нагагь сив ухIай аятти кIвалас ушуна дагIай IуьтIухаб е ухухаб фи ичира, сив кея. Ги сив ухIа, гьарта вахтт хьасттегьен, гис гунагь адава.
АЛЛАГЬДИС ИДЖИ ЯГIА.
