Рамазанов Абдулмаджидан (Кьулачарин) бина э Агъуларин райондин Типпигъарин хIуриъас. Ме бицIи ами кIине мин дад. Етум хьехаб, лап бицIи шиникквди ами, хьуне микес хIуьппехъен, учин бабас кумак хьас, хизанарин дуламиш хьас. Гьетегунахъас хаб гикес хьуна амилгуне идже хIуьппехъен. Сагелай ге и колхоздин хIуьппехъен, хабди хьуне гикес чуданарин хIуьппехъенра. Са джандис рехIети аркьа кар дагу идеми и ге. Iайи загьматар дивуфе ги. Инсанарин джалгайигI идже инсан э пуна ттур уйи Iебдулмаджидан. Са баракатин къун суман инсан и ге, рекъер-раджарин гъавурдиъ ая идеми и. Джалла гебурин куншибури ппара хIа гафарар аркьа Iебдулмаджидан. ГамачI-цIакIин ая вахттуни гъил гьучихьаф и хъуншибурис. Гьананра хатир ихьу идеми давуйи.
Iебдулмаджидан хизандис агъаф и Тамам, Баджин руш. Тамаман бинара и Типпигъарин хIуриас, Гурдарин тухумдиас. Ге хеф и 1935 иса. Са хIилла, чара акьуне ми учис хурубасра махьтабиъ. Хуруна ккиркIухаб, 1955 иса ушуне ме шувас. Учин шуй Iебдулмаджид суман, ппара Iайи загьматилди лиху дишагьли э Тамам. Идеми суман хIа сурсатарин шишалар хъархъай хьуне ги райпойин дукванариъра исккалатариъ. ЯрцIур килавар айя шишалар гIурин, бурунзин, курмабурин, хъара сасра задар ая шишалар Iар аркьайхьуне ми. АцIун гагьди кар акьуне ми райпойин идарайиъ. Хабди, уч Iайи иттархьехаб, къикъеттар гъадивас кьуват учин джандихъ хъандавахIела, мин тIалаб бегьем акьуна, ме алийине джуре кардил. 20 истти усттуруджвелди лихуне Тамам райпойин дуканариъ.Са Iу исари колхозин чIирарин гузурвелра акьуфе.
Тамам Баджаевна алми дуньянйил, хIа яшар хьасттегьен. Ге ппара ккане абаб и учин джалла багунттарин. Учин шиниккварин, хуттуларин, къуншибурин, хIурин инсанарин арайиъ мис ппара хIуьлмат уйи. Iекьул фацанас ягIаттис Iекьулра, насихIетра ирцIанди. Iебдулмаджидасна Тамамас ппара Iайи кканди чиппин хIур, хIурин инсанар, багу-кIилар.
Iебдулмаджидна Тамам и дегIвин вахттунин шиниквар. Гебури ппара ахъаркьай вейи те тушкин исарихъас. Фишттин гашар, мекIер, ягъар, Iуьшар чиппил рукьунчин те вахттари. Iари чиппис дава, аме джалла инсанарисра фишттин тушкин исар тебур хьучин.
Iебдулмаджидана Тамама хуна хIа акьуне муйя шиниккв: Iу кIиркIна ерхьи руш. Те вахттуни гидегьен шиникквар джалла ухIуна хIа акьас, садра дакIина, ппара зурбавел и. Гебури чиппин шиникквар джалла дуьхьуьна сакин акьуная. Агьал Iебдулмаджиданра Тамаман шиниккварилас алттина ая 16 хуттулар, 20 хуттуларин шиникквара. Чаб Iудара гебур дуньяйил андава- Iебдулмаджид кIине 1992 иса, ерхьцIур исра дахьуна, Тамам кIине 2021 иса. Гунагьар гIеф акьурай чиппин, джанаттиъ мукь хьурай.
Нафият Шамсудинова
