Инсанарис  фарахIвел адава ме агьал ая коронавирус агъа итталигьас. Са джуьра алттархьагунас, сасра джуьра гъайша ме итталин. Агьал ая «омикрон» агъаф  хъара ппара дахи кедишаф э, хIаттарис суман бицIиттарисра. Гьер ягъа хабар ирцIанде ме итталин сан гъайшибахъас , са ягъан арайи 200 дегьен инсандис хьуна агвар аркьая   хIисабарилди. ХIапай ме иттал читин верефра, алзияфра руб  дайирхIуттарис э.

Миштти идегуна, духттурарин садпе тIалаб э вахттунис  руб йирхIуб. Духттурари суман, ме кардихъас  гъургъая гIелимар, диндин гIелимар, имамар, джалла хIа инсанар. ЭхIттият акьубахъас, хъара маскабур, ича дарманар ишламиш акьубахъас.

Мегелай чин ме кардихъас, са Iу суалин джувабарихъас, хабар гъушуне хье Агъул райондин имамарин хIаттифас  Магомедов Юсуф Нурисламовичафас.

— Ассалам алейкум, Юсуф Нурисламович! Чвас агьал аргвая хье дуньяйин гьава ме COVID-19 агъа итталихъас. Инсанарис са бицIи дехIера ачухъ хьас мункинвел адава, вахтт гIартай вахттунис гъайша цае джуьра ме итталин. Фишттин насихIетар, тIалабар  ая чве диндин гIелимарин,имамарин?

— Ваалейкум ассалам чвас, диндин чияр, чуппар! Э, агьал хIекьдан читинди ая  хье дуньяйин гьава.

Че садпе насихIет э духттурари петтар акьуб, руб йирхI агъайчин, йирхIуна кканде, нагагь ве джандис зиян даверехаб, хъара сасра гIуьзур кидахаб, фикир акьуна, эхIиттиятра акьуна кканде. Чин мазгитаъ къулгун акьас вере инсанаривасра тIалаб аркьа , маскабур, ича дарманар ишламиш акье пуна. Хъара мазгитаъ къулгун аркьая инсанарин  арайиъ манзил верегъилди.  Хьин агьал  гьер инсанди мишттин эхIттиятар дакьучин, хьес хъара читин хьасе. Агьал хьин, хIаттари  мишттин эхIттиятар акьухаб, хье шиникквара иттар хьасттава. Духттурари, хIаттари гьакIанди агъа чIалар, аркьая тIалабар дава. Гьер инсанди фикир акьуна кканди ая, учихъас суман хизанарихъас, илдешарихъас, хIуриъ ая инсанарихъас. Хьин агьал  са хIуриъ ая инсанар са хизан хIисаб э.

Хъара зас пас кканде,  сагъвелар хьурай, итталар хьагьас варха хьурай, диндин чиярна чуппар.  

Наибет Гасукаева