Мирзоева Байранкиз Шабановна э выпускница Типпигъарин махьтабин. БицIи классариас мич ге руш э са Iайи фагьум фаф. Махьттабиъ ги ппара иджи хурай и. Дарсар гис ппара Iайи дахи ягIар верефи. Байранкъиз, учин хIададан рекъуьъ ушуна, гIешкъ афи математикайиъ.
Байранкъиз са яга дехIера дарс дахуруна махьтабиди ушу руш дава. Садпе ученица и ге чиппин классиъ. Мус, нандиъ махьтабин мегIрака вей айчин, гьетисагI гIаверефи Байранкъиз учин классихъас гIачучIуна. Найе предметиас олимпиада айчина, гьетисагIра гIавефи Байранкъиз. Садпе, Iудпе мукьар гьемишан гъуршанф и ги. АцIуна грамотабура файя гив ге мегIракабурин.
Махьтаб кIиркIуна гъушу аттесттатиъ кьиматар гин э Iари гIуьфудар (с отличием).
Учин гIешкъ аяхIела математикайиъ, джаллабури мева агъайчира, Байранкъиз ушуне хурас ДГУйин математикайина компьютердин гIилмибурин факультетиди. Агьалра идже акьуне зун мич хурас адинадала агъайдава ги.
Агьал Байранкъиз Мирзоева ая хьибудпе курсуниъ. Ме хьибу иса ги иджвелин чIал дала дадар бабарис пас атуфдава учихъас мегIелимари. Ги гIешкъунилди хурай ая гисаъ. Кьиматар гис Iари гIуьфудар дала адава. Сессибура ги ирцIанде батIарди учин вахттуни.
Уч хурадегьен гагьди учихъай хураттарихъайра ппара иджи аве ге. НуьхIуьбат, хIуьлмат чаб чиппихъай ппара иджи ая гин курсунин мутIалимарин арайиъ. Идже чIалдала агъайдава гихъас гин курсуниъ аттари.
— Джалабури садпе курс ппара читин ве агъа, ама зас фера читин хьундава. Ппара хурас алчархьай э, ама читинвелар адава, — агъа Байранкъиза, — зас кканве математика, дехIела гIешкъ ай хурас кканве зас ге предмет.
Читин факульттет ичира, хъара Байранкъизас вахтт ве джуре общественный курара акьас.
— Зас кканве гьер сентябрьдин вазала мисаъ аркьа организаторский курар садпе курсуниъ аттарихъай. ГIаттива гьер группайис тьютот-хIамутIалим, гебурис кумак аркьаф, гебур вардиш хьасттегьен гисаъ, гебурин хурубан суаларис кумак акьас, — ахъаркьа Байранкъиза.
Мирзоева Байранкизахъ хъайя ппара грамотабура иджи хурубан. Ге гIачучIа гьер джурайин конкурсаригI, КВНаригI учин факультетин гьава гъадивас.
Магьмиштин зурба, Iекьулар ке, хIаттарис хIуьлмат аркьа руш э Байранкъиз .
МехIелдис хурас аме Байранкъизас Iу ис, хабди адес йиркIураъ ая гин учин хIуриди, аллагьди амур акьухаб.
«Агъуларин хабарар» газетин работникари мубарак аркьая Байранкъизас, хъара джала агъуларин студентарис, чве хIаягъ! Чвакес хуруна идже пешакурар хьурай, хье райондин ттур гъадиваттар!
Нафият Шамсудинова
