Рамазанов БазукIай Махмудович хуная 1939 иса Агуларин райондин Гехъуьнарин хIуриъ. Ге э са гIеджиз хизанарин хулаас. АцIуна загьматар алчархьуна идеми э ге. БицIигунанхаб учин дадасна бабас ппара кумак акьунафе БазукIай Махмудовича. Ге ери ис хьехаб ушуф э махьтабиди. Махьтаб ми лап иджи хуруна кIиркIуне. БазукIай Махмудовичас ппара иджи ягIарвей хьуная математика. ИдехIела ми, учис кканверехIела математика, кьаст акьуная , махьтаб кIиркIухаб, гьеге дарсарин мегIелимвел акьас.
ЙицIудпе класс кIиркIухаб, ушуная ме хурас Махачкалайиди, педагогический инсттиттутин математический факульттетиди. Гисаъ БазукIай Махмудовича иджи хурай хьуне.
Хуруна кIиркIухаб, адине ме учин жуван хIурин махьтабиди кар акьас. Аде иса демари ми идже мегIелим э пуна агвар акьуна ая уч. БазукIай Махмудовича батIарди гъавурди ихьай хьуная шиникквар дарсунин. Учин дарс ги ахъаркьай хьуная арттистти суман. Шиникварисра ппара Iайи кканвей хьуная ге мегIелим.
БазукIай Махмудович — мегIелим «ОТ БОГА». Ги кар аркьай уйи йиркIураастти. Махмудовича шиниккварин джуревел аркьаф давуйи. Шиникквар дакканттаривас кар акьас верефттава мегIелимвелди. Классин дад суман авей хьуная ге. Гьер усариди эксккурсибуриди гъайи ги учин классин шиникквар.
Шиниккварин дадар- бабаринра арайиъ хIа хIуьлмат уйи БазукIай Махмудовичас. Учин дарс Махмудовича ппара Iайи гIешкъ ай гъайи.
Олимпиадабуриъ гьемишан садпе, Iудпе мукьар гъуршанф и гин шиникквари. ОГЭбурис, ЕГЭбурис ппара батIарди хIезур аркьай верефи ги.
БатIарди кар аркьа вахттуни, гьер джурайин джавизар ирцIанф и БазукIай Махмудовичав районойиас, махьтабиас.
ХIуькуматин джавизара ппара хъайя Базукай Махмудовичахъ. ГебуригI гIайя «Заслуженный учитель Дагестана» агъаф. Ге джавиз Махмудовичас йинафе 1982 иса
ГIифцIур истти кар акьуная БазукIай Махмудовича учин хIурин махьтабиъ. Учин вахттуни кар акьуфе завучвелди. Хабди ацIун исари Махмудовича акьуне директторвел Гехъуьнарин махьтабин. Са суалра кехIей учин уликкес ккеттархьас артаф давуйи- ибгIавел, мерттвел махьттабин, мегIелимарин дарди-балабур. Джала мегIелимарира, техработникарира, шиникварин дадар бабарира ппара хIа гафарар аркьа БазукIай Махмудовичан. Ги авала дарсар йиная шиникквари ппара ппара идже чIаларилди йиркIурал аркьа Махмудович.
«Гин дарсар агьалра кехIей кIвалди аме час. Учира батIарди ахъаркьай ягIар аркьафи, чакесра ппара тIалаб аркьафи,» — агъа гебури.
Махмудович Iари математик дава, ге гьер бугухъди багун зигьин файя идеми э. Дарс ада вахттуни ги лиркIенди агъул чIалан шеирар. Агьал айя гин шеирарин китабар. Гин китабирикес дарсар ирцIанди ая джала райондин махьтабариъ.
Учин хуланра джала багвар дузди ухIафе Базукай Махмудовича. Хизанарихъайра нюхIуьбатилди дуламиш вея ге. Махмудовичана гин хьира Iейши ухIуна хIа акьуная ерхьи шиникв. Джалабурис йиная образованибура. Са кIиркI БазукIай Махмудовичан, Мазай БазукIаевич, э замминистра здравохранения РД.
АцIуна исар э БазукIай Махмудович пенсиди айчIуна. Амма сакинди экьвас давей, учин хуттуларис дарсара, Iекьулара ицIанде ги.
БазукIай Махмудович, вун дарсар е шиникквари, вахъай кар акьу мегIелимари вас ацIуна баркалла агъа. Джандиъ сагъвел хьурай, йиркIурас рехIет хьурай ве.
Нафият Шамсудинова
