Ахиран Iу исан арайиъ, коронавирус бадилхье вахттунилас,  инсанарин Iуьмурар, фикирар гъадаркуне. Ме иттал хьехъди адиф варха хIуькуматариас э. Сифтта хъудугъай хьуне инсанар, Iемалар э агъай. Амма ягIайин ягъас ме иттал кидиркьу хизанар андава. Са ппараттар рехIетти иттархьуне, са ппараттар лап Iайи хьуне, кIеттара ппара хьуне. Ме итталин гьавайин гъавурдиъ архьас ппара читин э. Е хIаф, Iуьсеф, джигьилф дагъай Iайи киркьуттар ккертай дава.

ХIуькуматарин хIаттарира, духттурарира ме иттал алтухъ алттдавес алийиная гьер джурайин къадагъабур. ЦIакIинаригъди, гамачIаригъди, инсанар ппара аусариди мева пуна. Вахттуни гъилар мертт акьуб антисептикарилди, маскабур аликубар.  

Ппара хIа мункинвел ая иттархьеб инсанарихъай кар аркьая идарабурин. Сад мебурикес махьтабар э. Ме кардихъас ахттилатар акьуне Миссиарин махьтабин хIаттихъай Ибрагимов Зумрудин Рамазановичахъай.  

Мин чIаларилди, агьал ке Iайи мугъатилди хьуна кканди аяф мегIелимар э. Гьер ягъа шиниккварихъай кар аркьай ппара хIа мункинвел ая хулариас шиникквари иттал фай адиб. «Че идарайиъ кар аркьай ая гьер ешарин инсанари. ЯгIайин ягъас джаллабур гъавурдиъ ая ке иджеф вакцинация акьуб идеф. ХIапай махьтабиъ кар аркьаттари  акьуная вакцинация, амеф са Iу инсан э. Мебурира чиппил рукьучин акьаси,  амма агьалдис мебурив методводар фая. МегIелим иттархье вахттуни, ке ади кIил Iу хIефттайи гIаттархьа дарсаригIас. Мишттин арайи читин ве махьтабин кар. МегIелимара, шиникквара иттар дахьас, чин аркьа духттурари акье пуна эхIттиятар. Махьтабиъ ая гъиларис ича антисептикар, ая фадаваттилди ес маскабур. ЯгIа гьертти учил алеф акьуна эхIттиятар акьучин, багагь джаллабурисра идже хьасе», — пуне Зумрудин Рамазановича. 

Луиза Гусукаева