Кисарин ЭхIмад хуная 1925 иса Типпигъарин хIуриъ. Са гIеджиз хизанарин шиниккв и ге. БицIигунанхаб маларихъна, хIуппарихъ вес алчархьуне гис. Ппара Iайи гашар, мекIер ая исар и тебур. Са хIилла-чарайис суман ккиркIуная ги мактабра. ДегIвиъди дафайшуна, кIилин Iуьмур ушуная гин колхоздин маларихъна хIуппарихъ.
«АликIа канра, лекра адавай, ппара загьматар хьуфе че Iебис. Дургъу шумара алди, алархьуна иъра лекарилас, колхоздин
хIуппарихъас кам хьуфттава ге. Ппара колхоздихъас лиху идеми э че Iебай», — ахъаркьа гин руша ХIуьрипери.
Ппара дузвел фая идеми и ге. Гьегидегьен
гагьди хIуппарихъ, малариъ хъай са гъалатIра
акьу идеми давуйи ге. Гин хизандис агъафи
ХIуьри. ХIуьри хуная 1933 иса. Гера са гIеджиз
хулаас и. ХIуьри бицIигунанхаб кар акьунафе
колхоздиъ, гьер джурайин курарил. Хабди ги
кар аркьай хьуная нисар аркьа заводиъ Типпигъарин хIуриъ. Ппара лиху дишагьли и ге.
ЭхIмад Iебихъ хъахьуная хIа чу, ХIеким агъаф. ХIеким хьуная хIа гIелим, кьуръан хурас
ягIаф. Те вахтттари Iайи алгъузуна уйи гишттин Iераб чIал ягIа инсанарил. Фера пас ахттигьар адавуйи диндихъас. ДехIела ХIеким адикуная хIуриас, гьикуная Дулдугъди. Гисаъ хьуная гин ацIун исар. Хабди файшуная ге дегIвиъди. ДегIвиас хаб адина адава ХIеким.
Милицайиъди адиная хабар ХIеким кIиная агъаф. Илгуная гин якьу шиниккв: Мазай, БатIитIай, Кисай, ХIесан.
ХIесан ушуная Ашхабадиъди хурас. Тисаъ, яIар ахъас ушугуна, хIуьли дивуна кIиная ге. Тидас гъасра дахьуна, икIуна атуная ХIесан Ашхабадиъ. Аме хьибу шиниккв файдиная
ЭхIмад Iеби учин хулаъди ухIас. Са
бицIидиракегьей Iакнуквел даркьай ухIуная ми хуттулар, учин шиниккварихъай. Хабди акьуная ги Мазис, учис йина мукьуйил халра. Акьуная гис хизанра, Насрият агъаф.
ЭхIмад Iебихъ хъахьуная са чира, Iешура агъаф. Гера ппара колхоздихъас лиху хьир и дояркавелди, неджбервелди. ЭхIмад Iебихъ учихъ хьуне Iу кIиркIна якьу руш: ХIуьрипери, МехIемад, Аслан, Сакинат, Аминат, Гьидаят.
ХIуьрипери хуная 1953 иса. Мактаб
ккиркIухаб ушуная ме Махачкалайиъди хурас
медучилищейиъди. УчIас дахьуна адиная ме
хаб хIуриъди. Ушуная кар акьас нисар аркьа
заводиъди. Гидас ушуная ме кар акьас секретарь-машинисткавелди администрациъди.
Хабди кар акьуная ХIуьрипери совхоздиъ секретарь–машинисткавелди. Гисаъ кар
хъикIугуна, ушуная ме кар акьас финотделдиъди секретарь-машинисткавелди. Те усра хъикIуна, 48 исдала дахьуна илгуная ме кар фадавай. Сара нандиъра кар ми акьуна адава.
МехIемад хуная 1955 иса. Мактаб ги хуруная иджи. Математика Iайи ягIарвей хьуная
гис. Джаллабури классиъ гикес кеттлиркIенди хьуная математикайин дарсар. Мактаб ккиркIухаб ушуная ме Орджоникидзейиъди хурас «Горный политехнический институт», инженер-механиквел. КкиркIун адихаб кар
аркьай хьуная учин пешавелди Кизлярский
райондиъ Тушиловкайиъ. Тидас адихаб кар
аркьай хьуная ге милицайиъ гаишниквелди.
МехIемад кIине 1991 иса.
Аслан хуная 1958 иса. Мактаб ккиркIухаб
ушуная ге Калининская областиъди Лилидо-
во агъа шагьурдиъ мастер-сыроделарин курсар хурас. Ге ус ккиркIухаб кар аркьай хьуная Калмыкиъ мясо-молочный заводиъ. Тидас ушуная ге вышкайихъ кар акьас Туркмениъди. Тидас адиная хаб Ставропольский крайдиъди.
Сакинат хуная 1962 иса. Ги хуруная медучилище Дербент шагьурдиъ. КкиркIухаб са Iу исари кар акьуная медсестравелди райондин больницайиъ, сара ушуная айчIуна Ставропольский крайдиъди учин хизанара хъай. Тисаъ сара хIуькуматин курар акьуна адава ги.
Аминат хуная 1964 иса. Ги хуруная ветеринарный техникум. Хурун ккиркIухаб кар акьуная ветлечебницайиъ лаборанткавелди.
Гьидаят хуная 1971 иса. Мактаб ккиркIухаб
ушуная ге хурас медучилищейиъди Дербент
шагьурдиъ. Адихаб кар аркьай хьуная райбольницайиъ медсестравелди.
Ппара зурба, кардик хIав кке идеми и ЭхIмад Iебай. Даваф кьабул аркьа идеми давуйи.
«Сагелай хьуна уйи час че загьматин
хIекьикьа. Iеби иджи кьабул аркьай адавуйи ге. Зун батIарди руьхьуьна алийине ге якк усттулил. Хубджи гагьди деIелди экьуне Iебай. Сара темехI ппара хьуна IуьтIуне. Вун бабас магъагьа, агъайи зас Iеби», — ахъакьуне Аслана.
Гьегишттин дуз идеми и кисарин ЭхIмад
Iебай. Ге кIине 1997 иса. Гин хизан ХIуьри
кIине 1993 иса.
Нафият Шамсудинова
