Гьер инсандин, уч сагъди ая вахттуни, кьацIра иттархьасе пуна йиркIураъ атайдава. Итталар кьимат йина гъулан паяр дава. ЯгIа сагъди айчин багагь фиштти хьас ичин сайисра ягIайдава. Гьалдис уйи итталарихъди бадил хьуне хъара сасра азар. Агьал кIилди дуйиъ аруцая чIирхIе иттал – коронавирус.

Сифтта ме итталин хIел дагIай ппара читин хьуне духттурарисра инсанарисра. Ке удигьай унихьу вахттуни, Китайдиъ ме иттал гъайшине агъай, инснарин фикирариъ уйи хьехъди те варха хIуькуматариас рукьасттава пуна. Ама са вахттра дахьуна кIилди дуя фацуне коронавирусди.

Удигьай гIатте иттали еш хье инсанарис зарар ппара йине, Iудпе нубати адетти – джигьиларис.
Гьалра сакинди адава ме иттал. ЯгIайин ягъас Дагъусттандиъ ая 53158 иттаттар, 2586 – кIеттар, 49232 сагъ хьеттар.
Ппара иблис иттал э ме. Са иттая инсандикес кIилин хIурар кедишина иттарве. ЯгIа инсанарилас ппара аслу э эхттият акьуб. ЭхIттият акьуф суман гьал вакцина аркьаттара ппара хьуная, италик кеяф ягIай.

Хье райондис кIилди фатуная 3695 доз вакцинайин. Садпе руб йирхIуная 1416 инсанди, Iудпеф -1062 инсанди. Иттаттарин хIисаб райондин чIукь хьуна айчира, сад – Iуд кам вейдава. Агьал райондин больницайиъ ая сад инсан Ковид хьеф, садсара Iари пневмония хьеф, якьуд – ковид-пневмония аф.

Луиза Гусукаева