Хакиров Раджаб хуная 1889 иса. Ппара гашар, мекIер хьу идеми э ге. КIилин Iуьмурди
колхозариъ лиханди хьуфе ге. Лихуб ппара алчархьайи, амма кьимат адавуйи те вахттуни. Са чанг кьварахъас лиханди хьуная ге суьре ягъди. Хакиров Раджаб дегIвиъди файшуфттава, хIа яшар хьунахIела гин.
Ге хьуфе Северокавказский трудовой фронтиъ, Майкоп шагьурдиъ. 1943 иса адиная кIедж Хакиров Раджаб найч ушунчира дагIай гулуне (без вести пропал) агъаф. Ге кIедж адиная пуна адава багунттари гин хьирас. Фиттикесра хабарди адай, аркьай хьуная ги шадвелар. Инсанари хъаттрухай агъай хIуная: «Ме аге кIин шуйра уч фиштти айчин, дангъ атай руцай. Ламус, неч гIадай».
Хабди, фиштти хьуф ичира дагIай хьидин
мартдин садпе ягъари 1945 иса адиная ге
хIуриъди.
Гин хьирас агъафе Хакирова БатIитIай. Ге
хуная 1913 иса. Гера ппара колхоздиъ лиху
хьир э урчарихъанвелди, дояркавелди. Учин шуй армиъди файшугуна, шиниккварин дуламиш акьас, ги кар аркьай уйи колхозницавелдира, уборщицавелдира, IуькIер уцасра вей ахьуная колхоздин, хъара дояркавелра аркьай ахьуная. Ппара идже колхоздин неджберар и гебур. Шуй армиъди гъарегуна, гебурихъ хъахьуная гIуьфу шиниккв: хьибу кIиркIна Iу руш.
Ке хIа рушас агъафе ХIуьри. Ге хуная 1930
иса. ЙицIудпе класс ккиркIухаб, найчра душуна лиханди совхоздиъ экуная ге хIуриъ. Ппара зурба хьир и ге. Азман хIа къакъар IуькIерин гъарефи ги. Ппара идже ттур ая дояркара и ге. Колхоздин председательди хIа гаф аркьай ахьуная гин. Ге кIине 2008 иса.
Iудпеф кIиркIас агъафе БицIирамазан. Ге
хуная 1932 иса. ЙицIудпе класс ккиркIухаб
сара найчра ушуфттава ге. Гьерджуре курара
аркьай колхоздиъ, учин дуламиш аркай экьуная ге хIуриъ. Ацуна къаравулвелара акьуная ги пенсиъди вестти. Мус кIиф ичин ге, дузди гьинасра ягIай адава.
Хьибудпе кIиркIас агъафе КIулбан. Ге хуная 1935 иса. ЙицIудпе класс ккиркIухаб ушуная ге хурас сельхоз институтиъди зоотехнический факультетиъди Махачкала шагьурдиъди. Хуруна ккиркIухаб адина хIуриъди кар акьуная ги ке хIа зоотехниквелди «Тпигский» совхоздиъ. Хабди ушуная Табасаран райондиъди Сиртич агъа хIуриъди. Тисаъ гикес хьуная
совхоздин ке хIа зоотехник.
Сара ге ушуная кар акьас Дербентский райондиъди «Оборона» агъа колхоздиъди ке хIа зоотехниквелди. Хаб адиная хIуриъди кар акьас «Тпигский» совхоздиъ ке хIа зоотехниквелди. Ге кIине 2017 иса.
Якьудпеф руш э. Гис агъафе Селем. Ге хуная 1937 иса. ЙицIудпе классра ккиркIуна, кар аркьай колхоздиъ экьуная ге хIуриъ. Хабди уборщицавелара акьуная ги. Ге кIиная 1991 иса.
ГIуьфудпеф кIиркI э. Гис агъафе Рамазан. Ге
хуная 1940 иса. ЙицIудпе класс ккиркIухаб
ушуная ге хурас мединститутиъди лечебный
факультетиъ Махачкала шагьурдиъ. Хурун
ккиркIухаб якьу иса кар аркьай хьунафе Монголиъ. Хабди адиная Дербентиъди. Гисаъ ги кар акьуная кождиспансериъ больницайиъ
отделенин хIавелди. Ге киная 2000 иса.
Трудовой армиас адихаб хуная гебурис хъара Iу руш: Шамсиятра Саният.
Шамсият хунуя 1945 иса. ЙицIудпе класс
ккиркIухаб найчра ушуна адава хурас. Ги кар
аркьай хьуная са чIукь гагьди редакциъ, хуппай парткабинетиъ. Хабди ги уч пенсиъди
весттегьен кар акьуная собесдиъ. Агьал ги
нандиъра кар аркьай адава.
Саният хуная 1950 иса. ЙицIудпе класс
киркIухаб ушуная ге хурас мединститутиъди.
Ме Саният агъа рушахъас зун чвас ахъакьасе
сасрагелай.
Ппара хьурай агъуларихъ гишттин зурба
курар аркьа инсанар. Гунагьарин гIефу акьурай джалла кIиттарин, аметтарин джандиъ сагъвел хьурай, йиркIурас рехIетвел хьурай.
Нафият Шамсудинова
