Омаров Мусайи вакцинацихъас
Iу исра алтухъра хьуная, гьалдис кьацIра ундигьу коронавирус агъа иттал инсанарил хIевалат хьуна. Сифтта ме иттал бадил хьу вахттуни духттурарис ягIайдавуйи фиштти сагъ аркьайчин иттаттар. Гьер джурабурин руб, дарман аркьайи сагъ акьас. Сурис кумак вейи, амма кIиттара ппара хьуне.

Алттушу иса, иттаттарин хIисаб самуз чIукь акьас, инсанар ачикуне хулариъ. Фас пучин, инсандикес инсандикди кедиша иттале ме. Са вахттуни яваш хьуни иттаттарин хIисаб. Амма ягIайин ягъас инсанари эхlттият даркьай, алчушуб-алттушуб ппара хьуна, цIакIинар, хIаягъар хьуф хаб хьуная ппара иттаттар Дагъусттандиъ.

Ме кардихъас гъургъуне Дагъусттандин хIаф Сергей Меликов. Ми учин багухъас ппара тIалаб акьуне инсанарикес эхIттият акьубан. Къадагъа акьуб лазимвел адавай, алдай ардуцуб. Ке хIа тIалаб и мин инсанари вакцина акьуб.
Сергей Меликован чIаларихъай рази хьуне Агульский ЦРБйин главврачин заместитель Омаров Муса Кубутаевич. Ми учин багухъасра агъая инсанарис вакцина акьучин иджи э пуна.

«Агьал дуьйин гьава фидегьен четин хьуна айчин, джаллабурис аргвая. Гьерттилас ппара аслу э ме вакцина акьуб. Инсанди фикир акьуна кканде учихъасра, багулиф фаяттихъасра, багунттарихъасра, хIуькуматихъасра. Хьес аргвая хаб ягъалас ягъа иттаттар ппара веяф. Джалла ахттигьар ая инсанари йирхIучин ме руб идже хьасе. Ахттигьар адава ме руб йирхlас цIемуя ис дагьуттарис, гъайшас давей иттаттарис, сахарный диабет аяттарис, онко иттал аяттарис. Ая вакцинайихъ хъудугъаттара, гучIаттара, руб йирхIас дакканттара, амма ме вакцина дуьйил алдея хIа пай инсанарис дайирхIу гагьди, ме иттал адихьас хьасттава хье Iуьмурдиас», — пуне Муса Кубутаевича.

Луиза Гусукаева