Зас ахъакьас кканди ая ягIа гIуьфцIурна са истти инсанарис иджвел аркьай экьуна уйи духттурдихъас. Духттур э инсанар сагъ аркьаф. Ме ппара герек иде кар-пеша э инсандис, фас пучин ме дуьйил инсандин сагъвелдилас багьаф фера адава.
Хlурариъ ая духттурар хIуьлмат ая инсанар э. Ге далара адава гьер ягъа алгъузуна аяф сагlвелдил бицIиттарин хъара хlаттарин, иттар хьуная вахттуни духттуралди дала сара гьиналдира вейдава инсан уч сагъ акьас.
Джемеlетин чугъ сагъул гъушу гьунарар учин акьуна ая кардихъас Агъул райондиъ ая Гехъуьнарин хIурин медпунктин хIатти Гусейнов Багавудин Зиявудиновича. ГlуьфцIурна са истти кар акьуна Багавудин Зиявудиновича ппара инсанарис кумак акьуне. Са гаф-чIал кеттархьундава мис сасра духттурарин. Фая высшая категория квалификацинра.
Багавудин Зиявудинович хунаяф э 16-пе апрельдиъ 1936 пе иса Гехъуьнарин хIуриъ. Типпигъарин мактаб ккиркIубанхаб, хурас учIас ушуне ме 1957 иса Дербент шагьурдин медучилищейиъ, фельдшерарин отделениъ. Хурубар ккиркIубанхаб, хIуриъ ади вахттари, хьуне Багавудин Зиявудинович кардил медпунктунин хIавел аркьай 1959 иса. Сара, дад кlихаб, хулаъ дадан еринди амилгуная Багавудин Зиявудинович. Хулаъ ая бицIи ччиччисна ччуччус кумак акьуная хуруна ккиркIвас мактабар, дипломар гъушанас.
15-пе августиъ гьикуная Багавудин Гусейнов ГIанкIлугъдиъ медпунктунин хIавелди, тисаъ кар аркьай амилгуне ме 1970 исасттегьен. Гьеге иса хаб гьикуне Гехъуьнарин медпунктунин хIавел акьас. КIвал аркьа Багавудин Зиявудиновича авалан вахттуни ппара четин идеф фельдшерарис, ацIуна кар авейи агъа сатти ай са кумакра адавай. Iу сменайин мактаб ахьуна ая 300 шиникквар хураф. Гьерттихъ хъуттуфуна руб, дарман акьас пегуна, хIаттар кедавай. Са ис дахьуна валадарил аларуцас вей хьуная хулариъ. Гебур кидавай учин хулан курар авейхьуная: дараъ ушуб, гIараъ IуькIер акьуб, маларин, хIуппарин акьуб хъара сасра курара. Iайи иттаяттар гьикай центральный районный больницайиъ.
Гусейнов Багавудина учин хьирахъай Марзигет Муртазонаевайихъай вардиш акьуна, хIа акьуная ерчIу шиниккв: ерхьи кIиркIна хьибу руш.
2013 исанхаб айчlуна кардилас хулаъ ая экьуна, ачавей, аттвей. ХIадада аркьа пеша кьабул хьуна, давамлу аркьая хуттуларира. Шагьурариас адиная шиниккварна хуттулар кьабул аркьай, рекъуьл аркьай экьуная мебур. Чиппин эл ккеттвес ухlая малар, пеIер, ахъаджихlуна, са батlарди ая бусттанра.
Ацlуна ирхе Iуьмур йирай, джандихъ сагъвелра хъай васра, ве хизанарисра, Багавудин Зиявудинович.
Жавгарат Хамазаева
