Са Iуьссе багнишар фарцан гIурчахъан экьуна уйи чангур атай. Мис кканди ай хьуная учис макьамар йирхIас ягIар акьас. КьацIра батIарди йирхIас вей ахьунадава мифас, амма уч лап рази ахьуная учин макьамил учи атаф идехIела.
Гьаттвей ахьуная са идеми.
— Фи э вун аркьаф, фадихь ве чангур, гъуян ве туфангра, ях багниш фацанас, зас агьал суман дарагI багниш агуне, – пуная ми.
Атуна учин чангура, гъушуна туфангра ушуная ме даради. Ппара гагь хьуная мин багнишихъас руцай. Амма нандиъра багниш давай тин хьилра кехIей даджикIин бизар хьуная ме. Экьуная ме эл йирхIас атIу кIуранин кьабал. Сакинди ахьуная дар, са чинхъра кехIей адавай: е нахширин ун, е джакьвалан мегIни, — фера адавай.
Са арайилас унихьа мис са батIар чангурин макьам суманф. Са чIукь вахтт гIаттушухаб, хаб гьете ун ве мис.
Тамаш ве ме къуджайис:
— Гьина э гьан дараъ чангур атаф пуна. Гъайша ме кIуранин кьабалас, яваштти гIачаве дарагIди, чангурин ун вере усади дегьен. Ун вей ахьуная даран кIилихъас суман. Яваштти уч даргвагъилди фачучIуна са хIа кIуранив хъуттурфуная ме. Даран кIилихъ хибхел адегуна ахьуна кулаки кьатI акьу кур, тиас агъдагъун ахьуная гьер ирхвелин ибцIелар, тин кIенакк экьуна ахьуная багниш. Хъулангунас багниши фарцанди дивай хьуная ибцIел хаб фартай, ибцIел учин мукьуйилди верегуна чангури суман ун аркьай ахьуная макьам суман. Ге ун аркьагуна багниши алийина кIил йиркIв алияндира хьуная.
Къуджайисра кьабул хьуная ме ибцIеликес аркьа макьам.
ГIуьбехъми хаб гьаттвей ахьуная гIурчахъандин хулагьас ме идеми. Къуджа учин чангура фай экьуна ахьуная – гагь са син дивай, гагь сасра дивай, макьам атай.
Ме идеми хабар гъуршанде мифас:
— КIинев вун те багниш?
Къуджайи мис джуваб йиная:
— Фиштти э зун те луькIеф, гьете зун суман макьамчи идегуна.
Хуппай ахъакьуная ми ме идемис фиштти агунчин учис багниш макьамар атай.
Батитай Габибулаева
