Джура миллатарихъ суман агъуларихъра хъая чиппин хlикатар. Ягlа зас чвас ахъакьас кканде лап авалдин агъуларин халкьдин хlикат. Инсанари чиппин шиниккварис, шиниккварин шиниккварис ахъаркьай адинаяфе хьеалди.

Хьуне агъа, хьундава агъа са бабна геда. Гедайис агъайи Дирсам. Са ягъа пуна ая баба Дирсамас:

— Я геда, ях хьес абабан lудар гедабура хъай кlурар атlас. Зун чвас ччамна гунира икIасе.

— Хьурай, — пуне Дирсама.

Дараъди рукьуф, гедабури lуьтlуна чиппин ччамна гуни, хъучучlуне кар акьас. Ама Дирсам экьуна ая даракк аркьай мегlнибура.

Кlурар атlуна ккиркlуф, гедабури пуна ая Дирсамас:

— Я Дирсам, атl вас кlурар.

— Чун засра атl, — пуна ая Дирсама, — давачин фаша че баба икIуная ччамна гуни.

Чара дахьуна атlуна ая гедабури мисра кlурар. Шаб пуная мебури гьал хулаъди вес.

— Сайи зун хъахъ, сайи зе кlурар. Давачин баба икlуная ччамна гуни фаша, — пуне Дирсама.

Хъахъунай сайи Дирсам, сасрайи — гин кlурар, ушуна ая мебур хулаъди.

Дирсамал элдетмиш хьуна ай ами хьуна ая мучlе. Дарагl агуная мебурис са lекв ая хал. Ушуная мебур ге​ хулаъди. Гисаъ дуламиш вей хьуная Аждагьана гин якьуд шибер. lуьшуй гъархьуна ами кканхьуная Аждагьайис гедабур lуьтlанас. Джалла сакин хьуф, ачушуная ме гедабур гъархьуная хулаъди.

— Фуш гъархьуна ая, фуш адава, — пуная ми.

— Зун, — пуна ая Дирсама. — Ме арайиъ зас че баба зерфелиъ ай хьед гъарефе.

Фай зерфелра ушуная Аждагьа рухахъди.

Хьед агъарцlай элдетмиш хьуна ай ами ме, кегъикуна учин чибхарара, гьишина ая Дирсам.

Гьучархьуна ая мебурис паччагь. Ун ахъуная ми гедабурис учигьди. Чибхарар ушуная хулаъди, хъа Дирсам гьучушуная. Паччагьди пуне мис:

— Фулан усаъ Аждагьа ая, гин цlегь хъадикlина фаша зас.

Фай ресра ушуная Дирсам тич. Салан гъулиас адикlуна рес, аладивуна ая ми цlегьелан гlунарилас. Рахуная цlегь.​ Учис гъархьас адартаягуна, адикуная Аждагьайи ме. Фай цlегьра ушуная Дирсам паччагьдихъди. Гьеге lемалилди хъадикlине Дирсама Аждагьайин салаъ ая малара, хулаъ ая шейъэра.

— Гьал те Аждагьа уч фаша залди, — пуная паччагьди.

Хъацуная Дирсама литра, аликIуна бухарин бармакра, лекарил хурумин чакмабура, акьуна къадакъикес сюппелара, ушуна ая Аждагьайин хулаъди. Хъирхlуная ми раккахъ.

— Фуше? — пуная ти.

— Зун сундукьар батlар акьа къуджа э. Ве чlир хьу сундукь айчин, зун батlар акьасе.

— Валлагь зе сад ая, — пуна ая Аждагьайи.

Ушуна, файдина ая аргlу сундукь.

Алатlуна ая Дирсама суьве тахттабур, ачатуна къадакъар, учl пуна ая ми.

Учlуна ая Аждагьа, алихьуна кьулра, ачатуна къадакъара алгъихьуна сундукьра ушуна ая Дирсам паччагьдин хулаъди.

Атуна паччагьдин удигь сундукьра, ушуна ая Дирсам хулаъди. Дахъуная паччагьди сундукь, агъучlуна ая Аждагьа, lуьтlуна паччагьра, фай учин шейъэра ушуна ая хулади Аждагьара.

Расим Гучудадов