Дагъусттан – хье ухьтан ватан. КIураник кея кулар суман микра кея кулар. Са кул мин э Агъул. Ме ус кьацIра дагуттар муьхIтал ве. Са исал дагьарарин арайиас гIачушуна аттархьа са уркьаъди. Аккедаркуна багварихъди хъуттурфучин, аргва хIур идедегьен фагъутIу гьава дагьарар.
Амма гьемисан ухьтанвел гьеме дагьарарилна, чIирарилра, джиларилра э алеф. Гьер исан вахттунихъай духIуба ве мисан гьавара. ГIулана гъаз алатIуна, цулана хъуьхъе хьуна, Iурдана джагвар хьуна. Фи вахттуни хьучинра, гьер са вахтт джурейи батIарди аргва мисан.
Амма джаллайис ке ачухъ вахтт э мисаъ гIул. Фи кардис хьучинра идже вахттра э. БатIар гьава сувар, тук ахъу гъазе чIирар, суварин кIекIварилас алавере рекIве хьеттар. Садтталара джалла курарилас алтухъ э мисан мертте гьава. Миштти идехIела э байирдиъ ая хье миллатин инсанара гIулана мич адес алучIаф.
Амма шагьурдихъ хъуттурфуна мисан гьава къикъе э, ичира мисаъ яшамиш вея инсанар вардиш хьуная. Гьертти агърукьагъилди дуламиш аркьая чиппин хизанарин. Авалдин вахттарихъ хъуттурфуна чIукь хьунайчира, агьалра аме мал-къара ухIай дуламиш аркьаттар, хуппурар узуна мехIсул кеттиваттара. Джурейи алучIа узай бусттанарна багъарар, гьер джурейин емишин кIурарна сае джуре задара. Ккулинвел дакьуна варха чIирариъди вес алучIа багайин ягъа кьафун аркьа суман, гьер джурейин Iеле IуькIерна сае сара завал акьас.
Вахттар ккеттушучира мисаъ аме инсанар авал заманайин гIедатар цIуьппи ухIай аметтар. ГIалашуй кьабул акьуб, кар аркьаттис гъил гьучихьуб, хIа инсандис хIуьлмат акьуб, бицIиттис дагIаф ягIар акьуб — агьалра мебур бурджлу э ме кардис.
Хъара хъая ме халкьдихъ чиппин авал заманайихъас мич аркьай аме Iелеттара. Фи маджлис хьучинра, хIаягъ хьучинра, гIулар адичинра, ке удигьай акьуна гьучагъас алучIа авалдин емагар. Вахттар ккеттушучинра, агьалра ме емагарин кьимат аме. Кканчин куче-муссу, бакъукъ алгьату кьутIур, рекъуьн кьутIур, суьлен гIурикес акьу ликIинарин бахтта, теIдин чIакьаъферар, рукъу якк гIихьу хинкIар, ацIуттар, хъара сае джуре Iелеттара.
Вахттар алттвей, инсанар духIуба ве, Iуьмурара варха ве, бицIиттар хIа ве, хIаттар Iуьсе ве, амма хье ватан але мукьуйилас тIуршайдава.
Батитай Габибулаева
