Инсандифас са Iуьшуй ахун алчадайдигуна учин ахунил фи чара аркьагьан агъай аве. Инсанди агъа, зун сакин вереф зе хизандин багулиф э пуна. Фиштти хьасе ве гьава руьхI айчIуна, некьвариъ икIуна, хаб руьхI адигуна джандиъди малайикари сургъу-суал гъуянас.
ЯгIа некьвариъ икIу инсанарис садпе Iуьш хьасе, багулиф фушра фадавай. Инсан ахьасе фушра фачадивас давей, гьинанра кумак хъадавай, садтти. Фидегьен вахтт фарта инсанди лазим давере шейъэрис. Некьвариъ учIа вахттунихъас йиркIурал аркьай ичина, ппара курар атуна зикри аркьай ахьаси инсанди. ХIелал ризкь къазалмиш маркьа агъа чIал дава ге. Аллагьдигьас варха аркьа шейъэр атуна кканде, мегIнибурил йиркIв алийибна, вахтт фатас хъулан кинобур.
Вас унихьасе вун некьвариъ икIуна аларуцуна хаб вей ая инсанарин, ве багунттарин джилар. МучIе некьвариъ вас унихьасе ве багунттарин ишай ая лекарин унар. Нагагь вун дин гъай уйи инсан идехаба — сакинди ахьасе, нагагь бала гIадавай, гунагьар аркьаттарикес идехаба — Аллагьди гъил гъуйурай, рехIмиккес датIурай. КIина инсан фидегьен кканеф ичинара, икIуна некьвариъ ве.
Вун кIигуна шиникквари файшуна хьудегьен тегIди икIа джилиъ. Ху шиниккварис фидегьен иджвел акьу инсан ичинара, чукь гунагьин курариъ архьайчинара гебурис кканеф аркьай, ге ягъа гебури ваал руг алчархъа. Ме ягъалас вас кумак акьасе вун акьу идже курари. МухIаммад пайгъамбарди с.гI.в.с. ахъакьуна ая хьес джалла вере курарихъас. МухIаммад пайгъамбарди с.гI.в.с. пуна ая хIедисиъ, мегIна: «Малайикари экьвас акьасе ге хуппай алихьасе суал, фуш э ве Аллагь? Ги пасе:
— Аллагь.
— Фи э ве дин?
— Зе дин — ислам, — пасе кIитти.
— Фи пасе вун чваалди гьикуна уйи инсандихъас?
— Ге Аллагьдин лукIра пайгъамбар э, — пасе некьвариъ аятти.
— Зе лукIу дузди э агъаф, — пасе агъа Аллагьди.
Ун адисе агъа некьвариъ аяттис. «Аккихь лис джаннатиъ аяттарикес, аликI лил джаннатиъ аяттарикес, дахъ лис джаннатин раккар», — пасе Аллагьди.
Хуппай адисе гилди батIар ниъ хъая джигьил шиниккв. Фуш вун пуна, хабар гъуйугуна, зун ве савабин курар э пасе агъа джигьила. Гунагьар ппара къазалмиш аркьаттин курар четин хьасе руьхI агъдивай ами. Гин руьхI дивасе Iашу хьеяригIас тIусул йи рукь гIаттиваф суман. РуьхI ахьасе айчIвас дакканди джандиас, амма малайикди агъдивасе ге. Малайикара хьасе кIаре суратар гIаяттар, кафан хьасе джегьелемдиас. Гис вей ая некьварин гIезабар унихьасе Iари нахширарис, инсанарис унихьухаба гебурин чIарар джагвар хьаси гучI хьубаас.
Некьвар — инсандис ме дуьяйиъ ая хуларикес э. Инсанди ахиран хулахъас фикир аркьай кканде ме дуьяйихъасра фикир аркьай. Некьварихъас, кIибахъас хьин йиркIурал аркьаф дуздин рекъ фацанас пуна э. Некьварилди адиб, сунна э, ахиратихъас фикир хьас.
Инсанди фи ичинара са бала алчархьугуна учил, машиниай вей авария хьугуна, е иттал алгъазийигуна, миштти зас хьуна аяф зе гунагьарихъас э агъа. Фикир акьуна кканде ге гунагьари некьвариъ фи акьас ичина хьекес? Хьин ккихьасе хъара хIа гIезабарикк. Инсанди учин руьхIуьхъай джигьад аркьай кканде гьеммишанди. Аллагьдин амурдил рази вей кканде. Некьвариъ ай фи э ве дин пуна суал алихьугуна, ислам агъаттарикес хьурай хьин. Амин!
Камиль Мирзоев
